اياق كيىمنەن جاسالعان ەرەكشە مۇسىندەر - فوتو

استانا. قازاقپارات - ادەتتە اياق كيىم كيۋ ءۇشىن عانا جارالعانداي كورىنەدى. جىرتىلىپ، بولماسا توزىپ كەتسە لاقتىرۋدان باسقا امال قالمايدى.

بۇل بارلىق ادامنىڭ باسىنا كەلەتىن ەڭ ءبىرىنشى وي. ءبىراق، جارامسىز اياق كيىمدەرگە ءوڭ بەرىپ، ونىڭ كەرەمەتتىگىن قوعامداعى باسقا جاندارعا كورسەتۋ ماقساتىندا گۆەن مەرفي تاماشا مۇسىندەر جاساعان.

تاعى ءبىر قىزىعى ءاربىر ءمۇسىن بەلگىلى ءبىر كورىنىسكە يە بولىپ، اتى دا قويىلعان ەكەن. ءمۇسىنشى، سونىمەن قاتار، ءاربىر ونەر تۋىندىسى ارقىلى قاي ۋاقىتتا ادامنىڭ ءتۇرى قانداي بولاتىنىن كورسەتە بىلگەن ەكەن. ءارتۇرلى اياق كيىمنىڭ فورماسىمەن جاسالعان مۇسىندەردى تاماشالاڭىزدار.

مۇعالىم. اقىلىن ايتىپ، ءبىلىمىن ايامايتىن ۇستازدار قاۋىمىنىڭ ءتۇرى ۇنەمى شارشاڭقى كورىنەدى. سونى بىلگەن گۆەن مەرفي مىنانداي تۋىندى جاساعان ەكەن.

شارشاعان جاننىڭ ءتۇرى. بويىنان كۇش كەتىپ، ءوزىنىڭ ءالسىز ەكەنىن سەزىنە باستاعان ادام تەز ارادا ۇيىقتاۋدى ويلايدى. ادامنىڭ ۇيقىسى كەلگەندە الدىمەن ەسىنەيدى. سونداي ەسىنەگەن قۇبىلىستى ەستە ساقتاپ، شارشاعان ادامنىڭ ءتۇرىن وسىلاي كەلىستىرگەن ەكەن.

ۇيدە جالعىز قالعان جاننىڭ ءتۇرى. اياق كيىمگە زەر سالساڭىز، ۇلكەن ادامدىكى ەكەنى بىردەن بايقالادى. ۇيدەن كوپ شىقپايتىن جاننىڭ وبرازىن كورسەتۋ ءۇشىن، بار بولعانى وسى ويدىڭ ءوزى جەتىپ جاتىر.

جىگەرلى جاننىڭ ءتۇرى. بويىندا وزگەلەردەن ەرەكشە كۇشى بار ادام بىردەن كوپشىلىك كوزىنە تۇسەرى انىق. قىزىل موكاسينمەن ادام بويىنداعى بار ەموتسيانى كورسەتە بىلگەن ءمۇسىنشىنىڭ بۇل تۋىندىسى ونەردى باعالايتىندار اراسىندا ەرەكشە قۇرمەتكە يە.

ابوريگەن. ەسكى تۋفليگە ءوڭ بەرۋ ماقساتىندا اۆتور تاريحقا ءبىراز كوز جۇگىرتىپ، سوڭىندا وسىنداي تىڭ دۇنيە جاساۋعا شەشىم قابىلداعان ەكەن.

بالەرينا. ارنايى بالەت بيىنە ارنالعان اياق كيىم نازىكتىگى مەن سۇيكىمدىلىگى ارقاسىندا مۇسىنشىگە اسا قيىندىق تۋعىزباعانى كورىنىپ-اق تۇر. ەسەسىنە، بىتكەن جۇمىس تالايدىڭ ىستىق ىقىلاسىنا يە.

اياق كيىمدەگى ءتۇر. ميستيكالىق تۇرگە يە اياق كيىم قورقىنىشتى ادامنىڭ بەينەسىن سومدادى.

كۇلدىرگى جاننىڭ (كلوۋننىڭ) ءتۇرى. «كوپ كۇلىپ جۇرەتىن ادامنىڭ تاعدىرى اۋىر بولادى» دەگەن راس-اۋ شاماسى. اتاقتى يۋري نيكۋليننىڭ ومىرىمەن تانىس بولساڭىزدار، مىنا اياق كيىمنىڭ ءدال جاسالعانىنا كۋا بولاسىزدار.

باقا اياق كيىم. ءمۇسىنشىنىڭ ەڭ كوپ ويلانىپ، ۇزاق ۋاقىت جۇمساپ تۋدىرعان ەڭ قىمبات دۇنيەسى وسى دەۋگە دە بولادى.

جىرتقىش اياق كيىم. ءمۇسىنشىنىڭ تۋىندىلارى اراسىنداعى ەڭ قورقىنىشتى وبرازدى قىزىل كەدى وزىنە العان ەكەن. ازۋلى ۇشكىر تىستەردىڭ بەينەسى، ءبىر قاراعان جانعا سەستى كورىنۋى ابدەن مۇمكىن.

massaget.kz