زەرتتەۋ: سپورت دەپرەسسيا قاتەرىن ەكى ەسەگە ازايتادى

استانا. قازاقپارات - فينليانديانىڭ حەلسينكي مەن يۋۆياسكيۋليا ۋنيۆەرسيتەتتەرى بىرلەسىپ جۇرگىزگەن ەگىزدەردى زەرتتەۋىندە، سپورتپەن بەلسەندى شۇعىلدانۋ انتيدەپرەسسانتتاردى قابىلداۋدى ەكى ەسەگە ازايتاتىندىعىن كورسەتكەن.

زەرتتەۋ بارىسىندا ءبىر جىنىستى ەگىزدەردىڭ بەلسەندى سىڭارىن ونىڭ پاسسيۆ سىڭارىمەن سالىستىرىپ كورگەن.

زەرتتەۋشىلەر ورتا جاستاعىلاردىڭ دەنە قوزعالىسىنىڭ بەلسەندىلىگى دەپرەسسيانىڭ جەڭىل ءتۇرىنىڭ الدىن الۋدا ماڭىزدى ءرول اتقارادى دەگەن ۇيعارىم جاساعان.

زەرتتەۋ 1995- 2004-جىلدار ارالىعىن قامتيدى. وسى ارالىقتا ەلدەگى Kela زەينەتاقى ۇيىمىنىڭ مالىمەتتەر قورىنداعى ەگىزدەرگە جازىلىپ بەرىلگەن انتيدەپرەسسانت تۋرالى اقپاراتتار زەردەلەنگەن. سونىمەن قاتار ەگىزدەردىڭ دەنە دايىندىعى مەن ادەتتەرى تۋرالى انكەتالار دا زەرتتەۋگە پايدالانىلعان. ساۋالناما 1975، 1981، 1990-جىلدارى جۇرگىزىلگەن.

فيننداردىڭ %10-15 دەپرەسسيانىڭ جەڭىل تۇرىنە شالدىققان. ال ونىڭ اۋىر ءتۇرى ەلدەگى ەرەسەكتەردىڭ بەس پايىزىندا بار.