قازاقستاندا جەدەل جاردەم قىزمەتى تەگىن بولىپ قالا بەرمەك

استانا. قازاقپارات - قازاقستاندا جەدەل مەديتسينالىق كومەك قىزمەتىن شاقىرۋ اقىلى بولاتىنى تۋرالى الەۋمەتتىك جەلىلەر، مەسسەندجەرلەر ارقىلى تاراتىلعان اقپارات شىندىققا جاناسپايدى، دەپ حابارلايدى ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسپا ءسوز قىزمەتى.

بۇگىنگى تاڭدا جەدەل مەديتسينالىق كومەكتى شاقىرۋ قىزمەتى تەگىن مەديتسينالىق كومەكتىڭ كەپىلدىك بەرىلگەن كولەمى تىزىمىنە كىرەدى.

مىندەتتى الەۋمەتتىك مەديتسينالىق ساقتاندىرۋدى ەنگىزۋ اياسىندا 2017-جىلدان باستاپ اتالعان قىزمەت رەسپۋبليكالىق بيۋدجەتتەن قارجىلاندىرىلاتىن مەديتسينالىق كومەكتىڭ بازالىق پاكەتىنە ەنەدى.

بۇل پاكەت قازاقستاننىڭ بارلىق ازاماتتارى ءۇشىن قولجەتىمدى بولماق. وعان جەدەل جاردەم قىزمەتى مەن سانيتارلىق اۆياتسيا، الەۋمەتتىك ءمانى بار جانە شۇعىل جاعدايلاردا كورسەتىلەتىن مەديتسينالىق كومەك، پروفيلاكتيكالىق ەگۋ جۇمىستارى جاتادى.

وسىلايشا، جەدەل مەديتسينالىق كومەكتى شاقىرۋ قىزمەتى ق ر ازاماتتارىمەن قاتار، رەسپۋبليكا اۋماعىنداعى شەتەل ازاماتتارى ءۇشىن دە تەگىن بولىپ قالا بەرمەك.

ەسكە سالا كەتسەك، مينيسترلىك قىزمەتىنە قاتىستى بارلىق شىنايى اقپارات www.mzsr.gov.kz رەسمي سايتتا جاريالانادى. مينيسترلىكتىڭ فەيسبۋك الەۋمەتتىك جەلىسىندە رەسمي پاراقشاسى بار.