تاسماعامبەتوۆ بيلىكتەگى ۇزدىك ساياساتكەرلەر رەيتينگىسىندە كوش باستادى

استانا. قازاقپارات - «ستراتەگيا» الەۋمەتتىك جانە ساياسي زەرتتەۋلەر ورتالىعى بيلىكتە جۇرگەن ەليتانىڭ رەيتينگىسىن جاريا ەتتى.

ءبىر اتاپ وتەرى رەيتينگ ساۋالنامانىڭ ناتيجەسىندە شىعارىلعان. وعان 24 ساراپشى قاتىسىپتى دەپ حابارلايدى oinet.kz.

دالىرەگى ساراپشىلار دەگەنىمىز ساياساتكەرلەر، جۋرناليستەر مەن بيزنەسمەندەر جانە قوعامدىق ۇيىمنىڭ وكىلدەرى ەكەن.

سونىمەن 2016-جىلدىڭ ءبىرىنشى توقسانىنىڭ قورىتىندىسى بويىنشا قورعانىس ءمينيسترى يمانعالي تاسماعامبەتوۆ كوشباسشى بولىپ تابىلدى. قازاقستاندا وعان تەڭ كەلەتىن ساياساتكەر جوق بولىپ شىقتى. ودان كەيىنگى ورىن پرەزيدەنت اكىمشىلىگىنىڭ جەتەكشىسى نۇرلان نىعماتۋلينگە بۇيىردى. ءۇشىنشى ورىندا پرەزيدەنتتىڭ شتاتتان تىس كەڭەسشىسى، اتىشۋلى ميللياردەر بولات وتەمۇراتوۆ، ءتورتىنشى ورىندا سەناتور، ۇلتتىق قاۋىپسىزدىك كوميتەتىنىڭ ەكس-ءتوراعاسى نۇرتاي ابىقايەۆ، ال بەسىنشى ورىندا سەنات ءتوراعاسى قاسىم-جومار توقايەۆ تۇر.

ادىلبەك جاقسىبەكوۆ پەن احمەتجان ەسىموۆ التىنشى، جەتىنشى ورىنداردى، ال كارىم ءماسىموۆ سەگىزىنشى ورىندى يەلەندى. قانات بوزىمبايەۆ ونىنشى، داريعا نازاربايەۆا ون ءبىرىنشى، ءومىرزاق شوكەيەۆ جيىرماسىنشى، ال اۋىل شارۋاشىلىعى ءمينيسترى اسقار مىرزاحمەتوۆ 35-ورىنعا جايعاسىپتى.

يمانعالي تاسماعامبەتوۆ استانانىڭ اكىمى بولعان كەزدە وبلىس اكىمدەرىنىڭ رەيتينگىسىندە ىلعي ءبىرىنشى تۇراتىن. ول ۇكىمەتكە اۋىسقاننان كەيىن دە كوشباسشىلىق قاسيەتىن ساقتاپ قالدى. ال كەزىندە وبلىس اكىمدەرىنىڭ رەيتينگىسىندە ەكىنشى، ءۇشىنشى، ءتىپتى ءبىر جولى جىلدىڭ قورىتىندىسى بويىنشا «ۇزدىك اكىم» اتانعان وڭتۇستىك قازاقستان وبلىسىنىڭ بۇرىنعى اكىمى اسقار مىرزاحمەتوۆتىڭ رەيتينگىسى تومەندەپ كەتكەن.

ال رەيتينگتە ەڭ سوڭعى 42-ورىندا مادەنيەت جانە سپورت ءمينيسترى ارىستانبەك مۇحامەدي ۇلى تۇر.