الماتىدا قىزدار اراسىنداعى تۇڭعىش رەسپۋبليكالىق قۇران جارىسى اياقتالدى - فوتو
وعان رەسپۋبليكانىڭ ءار ايماعىنان ىرىكتەلگەن 160 قاري قاتىستى. العاشقى كۇنى 35 ادام اقتىق سىنعا شىعىپ، ءادىلقازىلار سوڭعى كەزەڭگە ولاردىڭ 21- ءىن ىرىكتەپ الدى.
قازاقستان مۇسىلماندارى ءدىني باسقارماسى باسپا ءسوز قىزمەتىنىڭ حابارلاۋىنشا، سايىسقا قۇراننىڭ 1, 2, 3, 5, 10 پارالارىن جاتتاعان ءار جاستاعى قاريلار قاتىسقان. قاتىسۋشىلاردىڭ قۇراندى جاتتاۋى، قۇران وقۋ ەرەجەلەرىن ساقتاۋى، اياتتاردىڭ ءتاپسىرىن مەڭگەرۋى، سۇرەلەردىڭ اۋدارماسىن ءبىلۋى سىندى قابىلەتتەرىن قازىلار القاسى جان- جاقتى سارالاپ، ءادىل باعاسىن بەردى.
ەلىمىزدە تۇڭعىش رەت وتكەن رەسپۋبليكالىق قۇران جارىسىندا 10 پارا بويىنشا وڭتۇستىك قازاقستان وبلىسىنان كەلگەن ايگەرىم انارقۇل جۇلدەلى 1- ورىندى يەلەندى. باس ءمۇفتي ەرجان قاجى مالعاجى ۇلى وعان 450 مىڭ تەڭگەنىڭ سەرتيفيكاتىن سالتاناتتى تۇردە تابىستادى. ال ايشا ىلەسپەك (استانا) قاريعا ەكىنشى ورىن بۇيىردى. Ⅱورىننىڭ جۇلدەسى - 370 مىڭ تەڭگە. Ⅲورىنعا لايىق دەپ تابىلعان گۇلزار تۇرعانجان قاريعا («نۇر- مۇباراك» ۋنيۆەرسيتەتى) 300 مىڭ تەڭگەنىڭ سەرتيفيكاتى تابىس ەتىلدى. سونىمەن قاتار، جارىسقا قاتىسقان بارلىق قاريلارعا قارجىلاي سىيلىق بەرىلدى.
يگى شارادا باس ءمۇفتي ەرجان قاجى مالعاجى ۇلى جۇلدەلى ورىندارعا قارجىلاي قولداۋ كورسەتكەن ءدىن جاناشىرلارىنا جانە ۇيىمداستىرۋ القاسىنىڭ مۇشەلەرىنە ريزاشىلىعىن ءبىلدىرىپ، ولاردى العىسحاتتارمەن ماراپاتتادى.
سايىس سوڭىندا باس ءمۇفتي مۇنداي يگى ىستەر الداعى ۋاقىتتا رەسپۋبليكالىق دەڭگەيدە ءداستۇرلى تۇردە ۇيىمداستىرۋ جوسپاردا بار ەكەنىن ايتىپ، قىزدارعا ارنالعان قاريلار ورتالىعىن اشۋ دا جوسپارلانىپ وتىرعانىن جەتكىزدى.
«يسلام ايەلدىڭ مارتەبەسىن كوتەردى. يسلام دىنىندە ەڭ قۇرمەتتى جاندار - انالار. ءدىني باسقارما ەلىمىزدەگى نازىك جاندىلاردىڭ ءدىنىمىزدى تەرەڭ وقىپ ۇيرەنۋلەرىنە بارلىق جاعدايدى جاساپ كەلەدى. ارداقتى جاندار يسلام ءدىنىن بىلسە، ۇيرەنسە دەيمىز. حالقىمىزدا: «ۇلتىڭدى تابيەلەيمىن دەسەڭ، قىزىڭدى تاربيەلە» دەگەن ناقىل سوزدەر تەكتەن- تەك ايتىلماعان. اللا جازسا، جاقىن ارادا قىزدارعا ارنالعان قاريلار ورتالىعىن دا اشۋدى جوسپارلاپ وتىرمىز»، - دەدى باس ءمۇفتي ەرجان قاجى مالعاجى ۇلى.
ال ءوز كەزەگىندە ءبىرىنشى ورىن يەگەرى ايگەرىم انارقۇل قۇراندى ءبىر جىل ىشىندە جاتتاپ العانىن ايتتى.
«16 جاسىمنان باستاپ قۇران كارىمدى وقىپ، جاتتاۋدى ۇيرەندىم. توعىزىنشى سىنىپتى بىتىرگەننەن كەيىن الماتى قالاسىنداعى مەدرەسەگە ءتۇسىپ، قۇراندى وقۋعا داعدىلاندىم. كەيىن ىستامبۇل قالاسىنا بارىپ ءبىر جىلدا قۇراندى تولىق جاتتاپ كەلدىم. قازىر قاتتى قۋانىپ تۇرمىن. ءبىرىنشى ورىندى الامىن دەپ ويلامادىم. ۇستازىما جانە وسىنداي يگى شارانى ۇيىمداستىرىپ جاتقان ەل اعالارىنا العىسىمدى ايتامىن»، - دەدى ا. انارقۇل.
