قازاقستان تاراپى رەسەيلىكتەردى ەكى ەلدى بايلانىستىراتىن جولداردىڭ قۇرىلىسىن جىلدامداتۋعا شاقىردى

استانا. قازاقپارات - قازاقستان تاراپى رەسەيلىكتەردى اقتوبە وبلىسىنا قاراي باعىتتالعان جولدىڭ قۇرىلىسىن جىلدامداتۋعا شاقىردى.

بۇل تۋرالى بۇگىن استانادا قازاقستان پارلامەنتى سەناتى مەن رەسەي فەدەراتسيا كەڭەسىنىڭ اراسىنداعى ىنتىماقتاستىق جونىندەگى كوميسسيانىڭ سەگىزىنشى وتىرىسىندا ق ر ينۆەستيتسيالار جانە دامۋ ءبىرىنشى ۆيتسە-ءمينيسترى جەڭىس قاسىمبەك ءمالىم ەتتى.

كۇن ءتارتىبى اياسىندا شەكارا ماڭىنداعى ايماقتاردى دامىتۋ، سونداي-اق «باتىس ەۋروپا - باتىس قىتاي» حالىقارالىق اۆتوموبيل جولىن سالۋ جوباسىن ىسكە اسىرۋ ماسەلەلەرى تالقىلاندى.

«قازاقستان مەن رەسەي اراسىنداعى ىنتىماقتاستىق اياسىندا بۇل - ءىرى ينتەگراتسيالىق جوبالاردىڭ ءبىرى. قىتايداعى ليانيۋنگان پورتىنان سانكت-پەتەربورعا دەيىنگى ءدالىز 8 مىڭ 400 شاقىرىمعا جۋىق. وسى رەتتە قازاقستان ارقىلى 2 مىڭ 787 شاقىرىم وتەدى. ءبىز بۇل جوبانى 2009-جىلى باستادىق، ياعني بۇگىندە بارلىق جول قۇرىلىسى جۇمىستارىن اياقتاۋعا جاقىندادىق. اقتوبە جانە قىزىلوردا وبلىستارىندا جۇمىستار اياقتالدى»، - دەپ توقتالدى ۆيتسە-مينيستر.

ج. قاسىمبەك بۇل باعىتتا رەسەي تاراپى دا جول قۇرىلىسى جوبالارىن ىسكە اسىرىپ جاتقانىن ايتا كەلە، وسى ورايدا ەكى ەلدىڭ ۇكىمەت مۇشەلەرى اراسىندا ءتيىستى تالقىلاۋلار بولعانىن ەسكە سالىپ ءوتتى.

«اقتوبە وبلىسى باعىتىنداعى «ۋفا-ستەرليتاماك-ورىنبور» جولى ۋچاسكەلەرىنىڭ قۇرىلىسى بويىنشا جوسپارلار 2018-2019-جىلدارعا ءبىرشاما كەيىنگە شەگەرىلىپ جاتقاندىعىن بىلەمىز. اتاپ ايتقاندا، ءبىز رەسەيلىك ارىپتەستەرىمىزدى بۇل جوسپارلاردى ىلگەرىلەتىپ، جىلدامتۋعا شاقىرامىز»، - دەپ اتاپ ءوتتى ول.

اۆتور: رۋسلان عابباسوۆ