پالەستينا مەملەكەتىنىڭ پرەزيدەنتى م. ابباس: ءبىز قازاقستاندى باۋىرلاس ەل سانايمىز - «قازاقپارات» ح ح ا تىلشىسىمەن سۇحبات

اممان. قازاقپارات - قازاقستاننىڭ يوردانياداعى ەلشىسى ازامات بەردىباي پالەستينا مەملەكەتىنىڭ ءبىرىنشى پرەزيدەنتى ماحمۇد ابباسقا قازاقستاننىڭ پالەستيناداعى ەلشىسى رەتىندە قىزمەتتى قوسا اتقاراتىن سەنىم گراموتاسىن تاپسىردى.

تاپسىرۋ ءراسىمى اممان قالاسىنداعى پالەستينا مەملەكەتىندەگى ەلشىلىكتە ءوتتى، وعان پالەستينانى ازات ەتۋ ۇيىمى اتقارۋ كوميتەتىنىڭ باس حاتشىسى (پ ا ۇ) سايب ۋرەيكات تا قاتىستى. كەزدەسۋ بارىسىندا تاراپتار تاياۋ شىعىستاعى جاعدايدى جانە پالەستينا ماسەلەسىن تالقىلادى.

ا. بەردىباي پالەستينا باسشىسىن قازاقستاننىڭ سىرتقى جانە ىشكى ساياساتىنىڭ نەگىزگى اسپەكتىلەرىمەن تانىستىردى. ەلدەگى قازىرگى الەۋمەتتىك-ەكونوميكالىق جاعدايدى، سونداي-اق مەملەكەتتىڭ ءىرى حالىقارالىق باستامالارى تۋرالى ايتىپ بەردى. قازاقستاندىق ەلشى اڭگىمە بارىسىندا تاراپقا قازاقستان پرەزيدەنتىنىڭ «الەم. XXI عاسىر» مانيفەسىندە اتالىپ وتىلگەن تاقىرىپتاردىڭ وزەكتىلىگىنە ءمان بەردى.

تاپسىرۋ ءراسىمى اياقتالار تۇستا «قازاقپارات» ح ا ا تىلشىسىنە بەرگەن سۇحباتىندا پالەستينا پرەزيدەنتى م. ابباس ءوزىنىڭ پالەستينا ماسەلەسىن رەتتەۋگە قاتىستى پەرسپەكتيۆاسىن ايتىپ جانە قازاقستانعا ريزاشىلىعىن ءبىلدىردى.

«ءبىز قازاقستانعا ريزاشىلىعىمىزدى بىلدىرەمىز، سىزدەردى باۋىرلاس ەل رەتىندە سانايمىز. ەلدەرىڭىزدى باۋىرلاس دەگەنىمدە مەن پالەستينا-يزرايل داعدارىسىن شەشۋگە بايلانىستى ب ۇ ۇ- دا داۋىس بەرۋلەرگە ەلدەرىڭىزدىڭ قاتىسقانىن ايتىپ وتىرمىن. پالەستينا ماسەلەسى - بۇل تەك قانا پالەستينانىڭ عانا ماسەلەسى ەمەس، ول اراب جانە بارلىق مۇسىلمان حالىقتارىنىڭ ماسەلەسى. قازاقستاندىقتار ءبىزدىڭ باسىمىزدان كەشكەندەرىمىزدى سەزىنىپ، بىزگە جاناشىرلىق تانىتۋدا»، - دەدى پالەستينا باسشىسى م. ابباس سۇحباتىندا.