قازاقستاندىق تەننيسشى ريم تۋرنيرىنىڭ ەكىنشى اينالىمىندا ۇلى بريتانيالىق ە. ماررەيمەن كەزدەسەدى
تىكەلەي سپورتتىق كورسەتىلىم ارقىلى ءمالىم بولعانىنداي، 28 جاسار م. كۋكۋشكين ءتىسقاققان تەننيسشى بولسا، ب. چوريچ نەبارى 19 جاستا عانا. جاستىعىنا قاراماستان، ب. چوريچ الەمدىك رەيتينگتە ۇزدىك ەلۋلىكتىڭ قاتارىنا كىرەدى.
اسا تارتىستى وتكەن ماتچتىڭ ءبىرىنشى پارتياسىندا م. كۋكۋشكين تاي-برەيكتە 7:6 ەسەبىمەن ۇتتى. ەكىنشى سەتتە ب. چوريچ 7:5 ەسەبىمەن ەسە قايىردى. شەشۋشى، ءۇشىنشى پارتيادا م. كۋكۋشكين ءوزىنىڭ شەبەرلىگىن كورسەتە ءبىلدى. ەسەپ 5:3 بولىپ تۇرعان ساتتە ماتچبولدى پايدالانا الماعان قازاقستاندىق تەننيسشى قارسىلاسى دوپ بەرگەن كەزدە جاقسى ويناي الدى. ءسويتىپ قايتا برەيك جاساپ، 6:4 ەسەبىمەن جەڭىسكە جەتتى.
ەندى ريم تۋرنيرىنىڭ ەكىنشى اينالىمىندا م. كۋكۋشكين الەمنىڭ ماڭدايالدى تەننيسشىلەرىنىڭ ءبىرى، وسى جارىستىڭ 2- راكەتكاسى، اتاقتى ەندي ماررەيمەن شەبەرلىك بايقاسادى.
ايتا كەتەيىك، جۇلدە قورى 4,3 ميلليون ەۋرودان اساتىن ريم تۋرنيرىنە ميحايل كۋكۋشكين ىرىكتەۋ سايىستارىنان ءساتتى ءوتىپ، نەگىزگى جارىسقا جولداما العان بولاتىن.
اۆتور: ەلجان ەرالى
