پاۆلودارلىق وقۋشىلارىنا جازدا ۇلىبريتاندىقتار اعىلشىن ءتىلىن ۇيرەتەدى

پاۆلودار. قازاقپارات - بيىل جازعى دەمالىستا پاۆلودارلىق وقۋشىلار ۇلى بريتانيا ەلىنىڭ WARWIK ۋنيۆەرسيتەتىنىڭ ەرىكتىلەرىنەن اعىلشىن ءتىلى مەن كومپيۋتەرلىك باعدارلامالاۋدى ۇيرەنەدى، دەپ حابارلايدى pavlodarnews.kz .

بۇل تۋرالى وبلىستىق ءبىلىم بەرۋ باسقارماسىنىڭ ورىنباسارى سايان مۇقانوۆ ءمالىم ەتتى.

- باياناۋىل اۋدانىندا شەتەلدىك مامانداردى تارتۋ ارقىلى مۇنداي شارا تۇڭعىش رەت ۇيىمداستىرىلىپ وتىر. 2020 -جىلعا دەيىن كوپتىلدىلىك باعدارلاماسىن جۇزەگە اسىرۋ ماقساتىندا جازعى ماۋسىمدا مەكتەپ جانىندا، اۋلا كلۋبتارىندا جانە قالا سىرتىنداعى لاگەرلەردە شەت تىلدەرىن ۇيرەتەتىن 200-دەن استام مەكتەپ جۇمىس ىستەيدى. بۇدان باسقا، اتالمىش ولكەدە وبلىستىق جانە رەسپۋبليكالىق وليمپيادالاردىڭ جەڭىمپازدارى اتانعان 100 وقۋشىعا وقۋ- جاتتىعۋ شارالارى ۇيىمداستىرىلادى، - دەيدى س. مۇقانوۆ.

بيىل وڭىردە تۋريستىك- ولكەتانۋ، ەتنومادەني، زياتكەرلىك، سپورتتىق، ەكولوگيالىق، شىعارماشىلىق باعىتتا 650 لاگەر اشىلادى. مۇندا 88 مىڭنان استام وقۋشى ءتۇرلى دەمالىس تۇرىمەن قامتىلىپ، ساۋىقتىرىلادى.