قازاقستان جەڭىس كۇنىن اتاپ وتۋدە

استانا. قازاقپارات - بۇگىن قازاقستاننىڭ ءار تۇپكىرىندە تاريحي، ماڭىزدى مەرەكە - ۇلى جەڭىس كۇنىن مەرەكەلەۋدە.

«بابالارىمىز بەن اكەلەرىمىزدىڭ جاۋىنگەرلىك ەرلىگى - قازاقستاندىق وتباسىلار ءۇشىن تەڭدەسسىز مۇرا. وتان قورعاۋشىلار كۇنى مەن جەڭىس كۇنىنىڭ قاتارلاسىپ كەلۋى ۇرپاقتار ساباقتاستىعىنىڭ جارقىن كورىنىسى ىسپەتتەس»، - دەپ اتاپ ءوتتى مەملەكەت باسشىسى نۇرسۇلتان نازاربايەۆ، وتان قورعاۋشىلار كۇنىنە ارنالعان مەرەكەلىك كونتسەرتتە سويلەگەن سوزىندە.

نۇرسۇلتان نازاربايەۆ سوعىس ارداگەرلەرى، تىل ەڭبەككەرلەرى ەرەكشە العىس بىلدىرۋگە، قۇرمەتتەۋگە لايىقتى جاندار ەكەنىن مالىمدەدى. پرەزيدەنت ۇلى جەڭىس - «بارلىق قاجىر- قايراتىن، كۇش- جىگەرلەرىن كەلەر ۇرپاققا باياندى بولاشاق سىيلاۋ جولىنا ارناعان ەرلەرىمىزدىڭ ەرلىكتەرىنىڭ، قاھارماندىقتارىنىڭ سيمۆولى» ەكەنىنە سەنىمدى.

«سىزدەرگە جاسالىپ جاتقان قامقورلىق، قۇرمەتتى ارداگەرلەر، سۇراپىل سوعىس جىلدارىندا جانقيارلىقپەن وتاندى قورعاعان ايقاستارىڭىز ءۇشىن بۇگىنگى ۇرپاقتىڭ سىزدەرگە كورسەتكەن قۇرمەتىنىڭ كىشكەنە بولىگى عانا. سىزدەردىڭ جاۋىنگەرلىك ەرلىكتەرىڭىزدى قازاقستان جەرى ماڭگى جادىندا ساقتايدى. ۇلى جەڭىس سىيلاپ، ەرلىك كورسەتكەن بارشا ارداگەرلەرگە باسىمدى يەمىن جانە العىس بىلدىرەمىن»، - دەپ ءسوزىن تۇيىندەدى مەملەكەت باسشىسى.

1941-1945 - سوعىس جىلدارىنداعى وقيعا قازاقستاندا تۇراتىن ءار وتباسىعا اۋىر ءتيدى. سوندىقتان دا بۇل مەرەكەنىڭ ءار قازاقستاندىق ءۇشىن ماڭىزى اسا زور.

ۇلى وتان سوعىسى جىلدارى مايداندا 1 ميلليون 800 مىڭ قازاقستاندىق شايقاستى. ءجۇز مىڭداعان وتانداستارىمىز وردەن، مەدالدارمەن ماراپاتتالدى. 500 گە جۋىق ادام كەڭەس وداعىنىڭ باتىرى اتاندى، 110 قازاقستاندىق ءۇش دارەجەلى داڭق وردەنىمەن ماراپاتتالدى.

ايقاستاردا جارالانىپ، قازا تاپقاندار، حابار-وشارسىز كەتكەندەر بار، تۇتقىننان 630 مىڭ ادام ورالمادى. قازاقستان جاۋدى جەڭۋ ءۇشىن كەڭەس اسكەرىنە بارلىق قاجەتتى مۇمكىندىكتى قامتاماسىز ەتۋدە وراسان زور ۇلەس قوستى.

قازاقستاندا جەڭىس كۇنى مەملەكەتتىك مەرەكە جانە دەمالىس كۇنى دەپ جاريالاندى.

جەڭىستىڭ 71 جىلدىعى قۇرمەتىنە سوعىستا قازا تاپقاندار مەن امان ورالعان باتىرلار، تىل ەڭبەكككەرلەرىنە ارنالعان كوپتەگەن شارالار ۇيىمداستىرىلۋدا.

دەنساۋلىق ساقتاۋ جانە الەۋمەتتىك دامۋ مينيسترلىگىنىڭ دەرەكتەرىنە سايكەس قازىرگى ۋاقىتتا قارتتار مەن مۇگەدەكتەرگە ارنالعان مەديتسينالىق- الەۋمەتتىك مەكەمەدە 304 ادام تۇرىپ جاتىر، ولاردىڭ تورتەۋى ۇوس قاتىسۋشىسى، 16-سى - ولارمەن تەڭەستىرىلگەن تۇلعالار، 34 تىل ەڭبەككەرلەرى.

ۇ و س جەڭىسىنىڭ 71 جىلدىعىن مەرەكەلەۋ قارساڭىندا جەرگىلىكتى اتقارۋشى ورگاندار ارداگەرلەردى قولداۋ، ولارعا قۇرمەت كورسەتۋ شارالارىنىڭ جوسپارىن ىسكە اسىرۋدا. 2016 -جىلعا ارنالعان جەرگىلىكتى بيۋدجەتتە ارداگەرلەرگە ءبىرجولعى ماتەريالدىق كومەك كورسەتۋ ءۇشىن 2,6 ميلليارد تەڭگە قاراستىرىلعان.