قانات يسلام جەڭىمپاز رەتىندەگى العاشقى سالەمىن جولدادى - كەسكىن
كولۋمبيالىق كاسىپقوي بوكسشى حۋان دە انحەلدى التىنشى راۋندتا تىزە بۇكتىرگەن قانات يسلام شارشى الاڭعا قازاق تاقياسىن كيىپ، كوك تۋىمىزدى جامىلا جەلبىرەتىپ شىقتى. سونىمەن قاتار، قانات يسلام جەڭىس كۇنىندەگى بۇل جەڭىسىن بارشا قازاق ەلىنە ارنايتىنىن دا جەتكىزىپ قالدى. «اسسالاۋماعالەيكۋم قازاق ەلى! وتە قۋانىشتىمىن! باۋىرجان اعا، سىزگە راحمەت! قازاق ەلى تىنىش بولسىن! راحمەت!» دەدى قانات يسلام. ەسكە سالايىق، شارشى الاڭداعى بۇل جەكپە- جەك قازاقستان ۇلتتىق ارناسىندا تىكەلەي ەفيردە كورسەتىلگەن بولاتىن.
«قازاق» لاقاپ اتىمەن الەمدىك كاسىپقوي بوكستا تانىلا باستاعان قانات يسلام كەزەكتى جەڭىسى ارقىلى ءوزىنىڭ مارتەبەسىن ارتتىرىپ كەلەدى. جەرلەسىمىز اۋەسقوي بوكستا جانكۇيەرلەر كوڭىلىنەن شىعىپ، كاسىپقوي بوكستا دا ءوزىنىڭ جويقىن سوققى يەگەرى ەكەنىن كورسەتىپ، كەرەمەت ناكاۋتتارىمەن تانىلىپ وتىر.
قانات يسلامنىڭ بۇل شارشى الاڭداعى 21 - كەزدەسۋى بولاتىن. ول بۇعان دەيىنگى جيىرما كەزدەسۋىنىڭ بارلىعىندا جەڭىسكە جەتىپ، ونىڭ 17 ىسىندە قارسىلاستارىن نوكاۋتپەن سۇلاتقان ەدى. ەندى نوكاۋتتەر سانى 18 گە جەتىپ وتىر، سونىڭ ىشىندە جەرلەسىمىز قاتارىنان التى كەزدەسۋدى مەرزىمىنەن بۇرىن اياقتادى.
بۇگىنگى شارشى الاڭدا كولۋمبيالىق جاس بوكسشى دا قازاقستاندىق بىلعارى قولعاپ شەبەرىنىڭ شىن مىقتى ەكەنىن مويىنداپ، ونىڭ كۇرزى سوققىسىنا شىداس بەرە المادى.
