ق ر ءبىلىم جانە عىلىم ۆيتسە-ءمينيسترى تاراز مەملەكەتتىك ينستيتۋتىندا بولدى
ساپار اياسىندا تاحير وسپان ۇلى وقۋ ورنىنىڭ ماتەريالدىق- تەحنيكالىق بازاسىمەن، عىلىمي ورتالىقتاردىڭ جۇمىسىمەن تانىستى، دەپ حابارلايدى تارمپي اقپاراتتىق- يميدجدىك قىزمەتى.
مينيستر الدىمەن «جەرۇيىق» ەتنوگرافيالىق ورتالىعىن ارالادى. وندا ۇلتتىق تاريحىمىزدان سىر شەرتەتىن جادىگەرلەر مەن بۇيىمدار قويىلعان. 3D فورماتىنداعى اۋديتوريادا كەڭ دالا، جايلاۋ جانە كيىز ءۇي بەينەلەنگەن. ورتالىقتىڭ باستى ماقساتى - مەملەكەت باسشىسىنىڭ ەل تاۋەلسىزدىگىن باياندى ەتۋدەگى، حالىقارالىق ارەنادا قازاقستاننىڭ بەدەلىن ارتتىرۋداعى ەرەن ەڭبەگىن ناسيحاتتاۋ، ۇلتتىق تاريحىمىزدى ۇلىقتاۋ. بۇگىندە مۇندا ينستيتۋت ستۋدەنتتەرىمەن ارنايى ساباقتار تۇراقتى تۇردە وتكىزىلىپ تۇرادى.
سونداي-اق قوناقتار جۋىردا اشىلعان مىرزاتاي جولداسبەكوۆ اتىنداعى اكادەميالىق ۇتقىرلىق جانە حالىقارالىق بايلانىستار ورتالىعىنا ايالدادى. بۇل ورتالىقتىڭ باستى ماقساتى - اقپاراتتىق تەحنولوگيالاردى زامان تالابىنا ساي پايدالانا وتىرىپ، جاستاردىڭ عىلىمي ىزدەنىسىنە جول اشۋ، ساپالى جوعارى بىلىكتى مامانداردى دايىنداۋداعى كرەاتيۆتى وي- پىكىرلەردى جيناقتاۋ، تاراتۋ. شىعارماشىل جاستاردىڭ ورتاسىن قۇرىپ، رۋحاني الەمىن جاڭعىرتۋ، ستۋدەنت جاستاردىڭ الەمنىڭ الدىڭعى قاتارلى جوعارى وقۋ ورىندارىندا ءبىلىم الۋىنا مۇمكىندىكتەر بەرۋ بولىپ تابىلادى.
«ينستيتۋت شەت ەلدىڭ جەتەكشى جوعارى وقۋ ورىندارىمەن، عىلىمي- زەرتتەۋ ينستيتۋتتارىمەن ىلعي دا ارىپتەستىك بايلانىستار ورناتىپ، ءبىلىم بەرۋ سالاسىن كەمەلدەندىرۋ ماسەلەلەرى بويىنشا سەرىكتەستىك قاتىناستارىن نىعايتىپ وتىر» ، دەپ اتاپ ءوتتى تارمپي رەكتورى داريا قوجامجاروۆا.
سونىمەن قاتار ۆيتسە- مينيستر «حالىق قاھارمانى» عازيز بايتاسوۆ اتىنداعى وقۋ- ادىستەمەلىك كابينەتىندە، ءجۇسىپ بالاساعۇن اتىنداعى تۇركىستان ولكەسىنىڭ تاريحىن زەرتتەۋمەن اينالىساتىن عىلىمي ورتالىقتا بولدى. اتقارىلعان جۇمىستارمەن جەتە تانىسقان تاحير وسپان ۇلى ءتول تاريحىمىزدى تەرەڭ زەرتتەپ- زەردەلەۋدە وسى تاقىلەتتەس ورتالىقتاردىڭ اتقاراتىن ءرولى زور ەكەنىن اتاپ ءوتتى.
تۇركىستان ولكەسىنىڭ تاريحىنا قاتىستى كەشەندى زەرتتەۋ جۇمىستارىن جۇرگىزۋ، تاراز ءوڭىرى مەن اۋليەاتا ۋەزىنىڭ تاريحى بويىنشا بۇرىن جارىق كورمەگەن ارحيۆ قۇجاتتارىن جيناستىرۋ جانە كوپتومدىق قۇجاتتار جيناعى مەن مونوگرافيالىق ەڭبەكتەر دايارلاۋ باستى ماقساتى بولىپ تابىلاتىن ورتالىقتا بۇعان دەيىن 30-دان استام عىلىمي ەڭبەك جارىققا شىقتى. ولاردىڭ قاتارىندا «قازاق حاندىعى» ەنتسيكلوپەدياسى، «قازاق حاندىعى» مونوگرافياسى، «تۇرار رىسقۇلوۆتىڭ بيوحرونيكالىق كۇندەلىگى»، «جەتىسۋ رەسەي يمپەرياسىنىڭ قۇرامىندا» جانە «تۇركىستان» جيناعىنىڭ قوس تومى ت. ب. بار.
اۆتور: مارلان جيەمباي
