ا. مۇحامەدي ۇلى ەلوردانىڭ ۆەلوماۋسىمىن اشتى - فوتو
مارافونعا قاتىسۋشىلار «سالتانات سارايى» الدىنداعى الاڭنان باستاپ «سارى ارقا» رەسپۋبليكالىق ۆەلوترەگىنە دەيىنگى 4600 مەترلىك قاشىقتىقتى ءجۇرىپ ءوتتى. سپورتتىق شاراعا قاتىسۋشىلار ءۇشىن ۆەلوسيپەدتى جالعا بەرەتىن ارنايى پۋنكتەر ۇيىمداستىرىلىپ، قالا تۇرعىندارىنىڭ باسىم بولىگى Astana Bike ۆەلوسيپەدتەرىن ءمىندى. مارە تورىندە شارانىڭ سالتاناتتى بولىگى ءوتىپ، وندا بەلسەندى قاتىسۋشىلار مەن جەڭىمپازدارعا ۆەلوسيپەد سىيعا تارتىلدى.
«وسىنداي ۇلىق مەرەكە قارساڭىندا سىزدەر مەن بىزدەر سپورتتىق قوزعالىستىڭ قاتىسۋشىسى بولدىق. قازاقستاندا بۇقارالىق سپورتتىڭ دامۋ دەڭگەيى قۋانتادى. ويتكەنى، سپورت، ءبىلىم جانە رۋحاني دامۋ عانا ءبىزدىڭ بولاشاعىمىزدى قامتاماسىز ەتە الادى. مەن بۇگىنگى سپورتتىق شارانىڭ ءداستۇرلى يگى ىسكە اينالارىنا سەنىمىم مول»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.
