نۇربولات قاناعاتوۆ تۋرالى نە بىلەمىز؟

استانا. قازاقپارات - قازاقستان رەسپۋبليكاسىنىڭ قۇرمەتتى سپورت قايراتكەرى نۇربولات قاناعاتوۆ تۋرالى نە بىلەمىز؟

ول قازاقستان ۆولەيبولىنىڭ جانە عىلىمىنىڭ دامۋىنا ۇلەس قوسقان عالىم ءارى جاتتىقتىرۋشى. بيىل 70 جاسقا تولدى.

نۇربولات قاناعاتوۆ جاستايىنان ۆولەيبول سپورتىنا اۋەس بولعان. الماتىداعى ى. التىنسارين اتىنداعى 2№ مەكتەپ-ينتەرناتتا وقىپ جۇرگەندە-اق قالالىق ۆولەيبول جارىستارىنا قاتىسىپ، كوزگە تۇسەدى. بويشاڭ، قيمىلى شيراق، ءار سوققىسى مىعىم جاس ويىنشىنى جاتتىقتىرۋشىلار الماتى جاسوسپىرىمدەر كومانداسىنا قابىلدايدى. مەكتەپتى ۇزدىك بىتىرگەن نۇربولات قاناعاتوۆقا قازاق ۆولەيبولىنىڭ اتاسى وكتيابر جارىلعاپوۆتىڭ ءوزى كەڭەس بەرىپ، قازاق دەنە تاربيەسى ينستيتۋتىنا (قازىرگى - قازاق سپورت جانە تۋريزم اكادەمياسى) جىبەرگەن.

«قازاق اۋىل شارۋاشىلىعى ۋنيۆەرسيتەتىنىڭ مەحانيكا فاكۋلتەتىنە ەمتيحان تاپسىرىپ، جاقسى باعا الىپ، وقۋعا ءتۇسىپ قويعان ەدىم. كەيىن وكتيابر اعا جارىلعاپوۆ كەلىپ «مىنا ۋنيۆەرسيتەتتى بىتىرسەڭ، كەيىن اۋىلدا تراكتوردىڭ استىندا ماي-ماي بوپ جۇرەسىڭ، ال دەنە تاربيەسى ينستيتۋتىن بىتىرسەڭ مەن سياقتى گالستۋك تاعىپ جۇرەسىڭ» دەپ گالستۋگىن قولىمەن ءبىر ۇستاپ قويعان ەدى. كەيىن وكتيابر اعا قۇجاتتارىمدى دەنە تاربيەسى ينستيتۋتىنا تاپسىرۋعا كومەكتەستى. سپورتتاعى جەتىستىكتەرىمنىڭ ارقاسىندا ينستيتۋتقا ەمتيحانسىز ءتۇستىم» دەيدى مەرەيتوي يەسى.

نۇربولات قاناعاتوۆ 1964-جىلى ينستيتۋتقا تۇسە سالا ستۋدەنتتەر قۇراماسىنا الىنىپ، شىمكەنتتەگى ءىرى جارىسقا قاتىسىپ، جەڭىسكە جەتكەن. قاناعاتوۆ ءتورت جىل بويى ينستيتۋتتىڭ ۆولەيبول قۇراماسىنىڭ نەگىزگى قۇرامىندا ويناعان. ينستيتۋتتى قىزىل ديپلوممەن ءبىتىرىپ، سپورت مينيسترلىگىنىڭ ارنايى جولداماسىمەن قازاق پوليتەحنيكالىق ينستيتۋتىنا (قازىرگى - ق. ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتى) جۇمىسقا بارادى. سول جىلى نۇربولات قاناعاتوۆ وتان الدىنداعى بورىشىن وتەۋگە شاقىرتۋ الىپ، الماتى ارميا سپورت كلۋبىنا جىبەرىلەدى. بۇل كلۋبتا دا ول ۆولەيبول كلۋبىنىڭ بەلدى ويىنشىسى بولعان.

«اسكەردە جۇرگەندە تاشكەنتتە ورتالىق ازيا كوماندالارى اراسىنداعى جارىسقا باراتىن بولدىق. باپكەرىمىز «تاشكەنتتە جەڭىسكە جەتسەڭدەر كازارمادا ەمەس ۇيدە تۇراسىڭدار» دەدى. ءبىز تاشكەنتتە بارلىق قارسىلاستارىمىزدى جەڭىپ، جەڭىسكە جەتتىك. ال باپكەرىمىز ۋادەسىن ورىندادى» دەپ ەسكە الادى نۇربولات قاناعاتوۆ.

اسكەردەن كەلە سالا قازاق پوليتەحنيكالىق ينستيتۋتىنا جۇمىسقا تۇرادى. ول ينستيتۋتتا ۆولەيبول قۇراماسىن قۇرادى. قاناعاتوۆ قۇرعان كوماندا ۆولەيبولدان ستۋدەنتتەر اراسىنداعى قازاقستان چەمپيوناتىن ءتورت جىل قاتارىنان جەڭىپ الادى. نۇربولات تەلمۇحامەت ۇلى ينستيتۋتتا وقىپ جۇرگەندە وتباسىن قۇرادى. وقۋ ورنىنداعى ۆولەيبولدىڭ دامۋىنا ەلەۋلى ۇلەس قوسقانى ءۇشىن باسشىلىق وعان الماتىدان پاتەر بەرەدى.

قاناعاتوۆ ۆولەيبول كومانداسىمەن كيەۆ، ماسكەۋ، سانكت-پەتەربور، تاشكەنت، بىشكەك، ءۇرىمجى، باكۋ، بەلگراد، ساماركاندتاعى ءىرى جارىستارعا قاتىسقان.

ۆولەيبول ويىنشىسى، كەيىن باپكەر بولعان نۇربولات قاناعاتوۆ كەيىن وسى سپورتتىڭ ەرەجەسىن جەتىك بىلەتىن مامان رەتىندە رەسپۋبليكالىق ءىرى جارىستاردا تورەشى دە بولعان. ۆولەيبولدان ۇلتتىق دارەجەدەگى تورەشى.

48 جىلدان استام ۋاقىت قازاقستانداعى بەلگىلى ۋنيۆەرسيتەتتەردە قىزمەت جاساعان نۇربولات قاناعاتوۆ بۇگىندە بىرنەشە عىلىمي جۇمىستاردىڭ اۆتورى. ول 50 گە جۋىق عىلىمي-مەتوديكالىق ماتەريال، بەس مەتوديكالىق وقۋ قۇرالىن جازعان. ا ق ش جانە چەحياداعى عىلىمي جۋرنالداردا زەرتتەۋ جۇمىستارى جارىق كورگەن.

نۇربولات تەلمۇحامەت ۇلىنىڭ شاكىرتتەرىنىڭ ءبىر بولىگى قازىر عىلىم كانديداتتارى، كەيبىرى ۆولەيبولدان جاتتىقتىرۋشى بولىپ ءجۇر.

ءبىلىم بەرۋ سالاسىنداعى ەڭبەگى ەسكەرىلىپ، نۇربولات تەلمۇحامەت ۇلىنا 2006-جىلى «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى»، سپورتقا قوسقان ۇلەسى ءۇشىن «قازاقستان رەسپۋبليكاسى قۇرمەتتى سپورت قايراتكەرى» اتاعى بەرىلدى.

بۇعان قوسا ق. ساتپايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ سپورت جانە دەنە شىنىقتىرۋ كافەدراسى دوتسەنت دارەجەسىن الادى. بىلىكتى مامان قازىر دە وسى ۋنيۆەرسيتەتتە شاكىرت تاربيەلەپ، ساباق بەرەدى. ەكى جىلدان كەيىن ۇستازدىق قىزمەتىنە ەلۋ جىل تولاتىن نۇربولات تەلمۇحامەت ۇلى ءالى دە ءبىراز عىلىمي جاڭالىقتار جازۋدى جوسپارلاپ وتىر.

نۇربولات تەلمۇحامەت ۇلىنىڭ بۇگىنگى تاڭدا جاس ۇرپاقتى دەنە تاربيەسىنە باۋلۋدا، سالاۋاتتى ءومىر سالتىن قالىپتاستىرۋدا ءارى ناسيحاتتاۋدا اتقارىپ جۇرگەن ەڭبەگى زور. ول - ۇستازدىق قىزمەتىمەن بىرگە باپكەرلىك قىزمەتى ارقىلى شەبەرلىك شىڭداۋعا ۇلەس قوسىپ كەلە جاتقان سپورت جاناشىرى.

بۇگىندە نۇربولات تەلمۇحامەت ۇلىنىڭ تاربيەلەگەن شاكىرتتەرى ەلىمىزدىڭ تۇپكىر-تۇپكىرىندە ۇستازىنىڭ يگى ءىسىن جالعاستىرىپ ءجۇر.

كۇنسۇلتان وتارباي