الماتى وتان قورعاۋشىلار كۇنىن تويلاۋدا - فوتو

الماتى. قازاقپارات الماتىلىقتار وتان قورعاۋشىلار كۇنىن تويلاۋدا. باستى مەرەكە اباي الاڭىندا ءوتىپ جاتىر. جيىن سالتاناتتى تۇردە مەملەكەتتىك انۇرانمەن باستالدى.

«بۇل كۇن ارداگەرلەر مەن شەكارا شەبىندە كىرپىك قاقپاي قىزمەت ەتىپ تۇرعان ساربازدار مەن ەل ازاماتتارىن ۇلىقتايتىن مەملەكەتتىك مەرەكە. تاۋەلسىزدىككە قول جەتكەن كەزدەن بەرگى ۋاقىتتا ەلباسىنىڭ سىندارلى ساياساتىنىڭ ارقاسىندا مەملەكەت شەكاراسىن ناقتىلاپ باسقا جۇرتپەن دوستىعىمىزدى نىعايتتىق. وتاندى قورعاۋ ءىسى قاي كەزدە دە ءار ازاماتتىڭ قاسيەتتى بورىشى، ابىرويلى مىندەتى. باس قولباسشى ەلباسى نۇرسۇلتان نازاربايەۆتىڭ ءجىتى باقىلاۋى مەن قامقورلىعىنىڭ ارقاسىندا قورعانىس سالاسى قارقىندى دامۋ ۇستىندە. قارجىلاندىرۋ جىل سايىن ارتىپ، قارۋلى كۇش قۇرىلىمدارى تەحنيكالىق تالاپتارعا ساي دامىپ، قارۋ-جاراقپەن جابدىقتالۋدا. اسكەري قىزمەتكەرلەردى الەۋمەتتىك قولداۋ نازاردان تىس قالعان ەمەس. ەلىمىزدىڭ قورعانىس قابىلەتىن ارتتىرۋعا الماتى ۇلەس قوسىپ كەلەدى. وتكەن جىلى قالامىزدان 2000 جاس بوزبالا قارۋلى كۇشتەر قۇرىلىمدارىنا، مەملەكەتتىك كۇزەت، شەكاراعا شاقىرىلدى. جىل باسىنان بەرى 450 جاس ۇلان وزگە وڭىرلەرگە اتتاندى»، - دەدى قالا اكىمى باۋىرجان بايبەك.

رەسپۋبليكالىق ۇلاندار دەسانتتارى مەن كۋرسانتتارى اسكەري قويىلىم قويدى. سونداي-اق، اسكەري قىزمەت قاتارىنا شاقىرىلۋشى 50 بوزبالاعا ارنايى سىي-سىياپات بەرىلدى. قالالىق ارداگەرلەر كەڭەسىنىڭ ءتوراعاسى ەرەنعايىپ شايحۋتدينوۆ جاس ساربازدارعا اق جول تىلەدى.

مەرەكەلىك شارا قازاقستان ەسترادا جۇلدىزدارىنىڭ كونسەرتىنە ۇلاستى. سونداي-اق، الماتى جاستارى وتان قورعاۋشىلار كۇنىنە ارناپ فلەشموب وتكىزدى.