ا ق ش جانە ەۋروپا قالالارىندا «ماڭگىلىك پولك» اكسياسى باستالدى

استانا. قازاقپارات - سەنبى كۇنى ەۋروپا مەن ا ق ش قالالارىندا ۇلى وتان سوعىسى كەزىندە قازا تاپقانداردى ەسكە الۋ قۇرمەتىنە ۇيىمداستىرىلعان «ماڭگىلىك پولك» قوعامدىق اكسياسى باستالدى.

كوپتەگەن ەلدەردە بۇل اكسيا العاش رەت وتەدى.

كەيبىر قالالاردا «ماڭگىلىك پولك» اكسياسى كەشتەۋ - جەكسەنبى جانە دۇيسەنبى، 8- جانە 9- مامىر كۇندەرى باستالادى.

اكسيا ۇيىمداستىرۋشىلارىنىڭ ر ي ا نوۆوستي اگەنتتىگىنە حابارلاۋىنشا، «ماڭگىلىك پولك» قاتارىنا «ۇلتى، ءدىنى، ساياسي جانە وزگە كوزقاراستارىنا قاراماستان، كەز كەلگەن ادام» تۇرا الادى.

سالتاناتتى اكسيالار ا ق ش، كانادا، گەرمانيا، فرانسيا، ۇلى بريتانيا، يسپانيا، شۆەيتساريا، ەستونيا، لاتۆيا، چەحيا، ليتۆا جانە تاعى باسقا كوپتەگەن ەلدەردە وتەدى.

«ماڭگىلىك پولك» - ادامداردىڭ ۇلى وتان سوعىسىنا قاتىسقان تۋىستارىنىڭ فوتوسۋرەتتەرىن قولعا ۇستاپ وتەتىن مارشتان تۇراتىن قوعامدىق اكسيا. ول جەڭىس كۇنى رەسەيدە جانە باسقا ەلدەردە وتكىزىلەدى.

بيىلعى جىلى «ماڭگىلىك پولك» www.polkrf.ru  عالامتور-پورتالىن اشىپ، جاھاندىق الەۋمەتتىك جەلىنى قۇردى. پورتال ۇلى وتان سوعىسى ساربازدارىنىڭ بۇكىل الەمدە تۇراتىن 290 ميلليون ۇرپاعىن بىرىكتىرە الادى. وندا اسكەري ءىس-قيمىلداردىڭ قاتىسۋشىلارى تۋرالى عانا ەمەس، تىل ەڭبەككەرلەرى، پارتيزاندار جانە سوعىس بالالارى تۋرالى مالىمەتتەر جينالادى. جاۋىنگەرلەردىڭ ۇرپاقتارى ۇرىس ورىندارى بولعان جەردە جينالىپ، ساربازداردى ەسكە الۋ مۇمكىندىگىنە يە بولادى.