ن. نازاربايەۆ: «نۇر وتان» پارتياسىنىڭ ءوزىنىڭ تالداۋ ورتالىعى بولۋى قاجەت
وتىرىس بارىسىندا مەملەكەت باسشىسى اتقارعان جۇمىسى ءۇشىن ا. مىرزاحمەتوۆكە العىس ايتىپ، پارتيا ءتوراعاسىنىڭ جاڭا ءبىرىنشى ورىنباسارى م. قۇل-مۇحاممەدتى تانىستىردى.
قازاقستان پرەزيدەنتى پارتيا ءتوراعاسىنىڭ ءبىرىنشى ورىنباسارى رەتىندە ا. مىرزاحمەتوۆتىڭ وزىنە جۇكتەلگەن مىندەتتەردى ورىنداعانىن، پارلامەنت سايلاۋىن تابىستى وتكىزگەنىن اتاپ ءوتتى. سونداي-اق نۇرسۇلتان نازاربايەۆ ا. مىرزاحمەتوۆكە جاڭا لاۋازىمىندا ءبىرقاتار كەشەندى مىندەتتەردى، سونىڭ ىشىندە جەر ماسەلەسىنىڭ ءتيىمدى شەشىلۋىن جۇزەگە اسىرۋ قاجەت بولاتىنىن ايتتى.
ا. مىرزاحمەتوۆ سەنىم ارتقانى ءۇشىن نۇرسۇلتان نازاربايەۆقا العىس ايتىپ، تاپسىرىلعان جاڭا سالادا ءوز مىندەتىن جاۋاپكەرشىلىكپەن اتقارۋعا دايىن ەكەنىن ءبىلدىردى.
سونىمەن قاتار، مەملەكەت باسشىسى م. قۇل-مۇحاممەدتىڭ جۋرناليستىك جانە زاڭگەرلىك ءبىلىمى بار ەكەنىنە، ءار جىلدارى پارلامەنت سەناتىنىڭ دەپۋتاتى، پرەزيدەنتتىڭ باسپا ءسوز حاتشىسى، كەڭەسشىسى، مادەنيەت ءمينيسترى بولىپ جۇمىس ىستەگەنىنە نازار اۋداردى.
قازاقستان پرەزيدەنتى پارتيا ءتوراعاسىنىڭ جاڭا ورىنباسارى پارتيانىڭ قىزمەتىن ودان ءارى نىعايتۋ قاجەتتىگىن ەسكەرە وتىرىپ تاعايىندالعانىن، «نۇر وتاندا» بۇل ءۇشىن قارجىلىق، كادرلىق جانە ماتەريالدىق رەسۋرستىڭ ءبارى بار ەكەنىن اتاپ ءوتتى.
- پارتيا قۋاتتى ساياسي كۇش بولىپ قالۋعا ءتيىس. بارلىق پىكىر، يدەيالار پارتيادان شىعۋى كەرەك. «نۇر وتاننىڭ» ءوزىنىڭ تالداۋ ورتالىعى بولۋى قاجەت، - دەدى نۇرسۇلتان نازاربايەۆ.
م. قۇل-مۇحاممەد وزىنە سەنىم ارتىلعانى ءۇشىن العىس ءبىلدىرىپ، پارتيانىڭ ءتيىمدى جۇمىس ىستەۋىن قامتاماسىز ەتۋ ءۇشىن بار كۇشى مەن ءبىلىمىن جۇمسايتىنىن ايتتى.
