بوسقىنداردى قابىلداۋدان باس تارتقان ەلگە ايىپپۇل سالىنۋى مۇمكىن

استانا. قازاقپارات - ەۋروپالىق كوميسسيا بوسقىنداردى كۆوتا بويىنشا قابىلداۋدان باس تارتقان ەۋرووداق ەلدەرىن جازالاماق نيەتتە.

كەرى قايتارىلعان ءار بوسقىن ءۇشىن 250 مىڭ ەۋرو ايىپپۇل بەلگىلەنگەن. ءبىراق بۇل باستاما ءبىرقاتار ەلدىڭ نارازىلىعىن تۋدىردى. ولار رەسمي بريۋسسەلگە قارسى شىعىپ، ءوز قۇقىقتارىن سوتتا قورعاۋعا دايىن ەكەندىكتەرىن جەتكىزگەن. ەۋروپاعا تابان تىرەگەن ميگرانتتاردىڭ تاعدىرى نە بولماق؟ پراگادا وتكەن ءسامميتتىڭ باستى تاقىرىپ وسى بولدى. بىلتىر ەۋرووداققا مۇشە ءاربىر ەل كۆوتالار بويىنشا 160 مىڭ ميگرانتتى ءبولىپ الۋعا كەلىسكەن ەدى.

ءبىراق بۇل كەلىسىم ورىندالماي وتىر. ەۋروكوميسسيا ميگرانتتاردى قابىلداۋدان باس تارتقان ەلدەردى جازالاۋعا شاقىردى. قارجىلىق سانكتسيالار -  ەۋرووداق ەلدەرىن كەلىسىمدى ورىنداۋعا ماجبۇرلەيتىن سوڭعى تەتىك. ءبىر ادام ءۇشىن تولەنەتىن ايىپپۇل قۇنى -  250 مىڭ ەۋرو. مىسالى، پولشا 6200 ميگرانتتى قابىلداعان جوق. سوندىقتان بۇل ەل 1,5 ميلليارد ەۋرو تولەۋى مۇمكىن. بۇل قاراجات بوسقىنداردى ارتىعىمەن قابىلداعان مەملەكەتتەرگە كومەك رەتىندە بەرىلەدى. ءبىراق بۇل باستاماعا پولشا، چەحيا، ۆەنگريا مەن سلوۆاكيا قارسى. پولشانىڭ سىرتقى ىستەر ءمينيسترى مۇنى ءبىرىنشى ساۋىردەگى ازىلگە بالادى. ال سلوۆاكيا مەن ۆەنگريا ەۋروپالىق سوتقا جۇگىندى.

پەتەر سييارتو، ۆەنگريا سىرتقى ىستەر ءمينيسترى:

- بۇل -  بوپسالاۋ. مۇنى ەۋروپالىق كوميسسيانىڭ ۇسىنىسى دەپ ايتۋعا كەلمەيدى. بوسقىندار بويىنشا كۆوتالار ماسەلەسى ءبىزدى تىعىرىققا تىرەپ وتىر. ەۋروكوميسسسيانى بۇل باعىتتان باس تارتۋعا شاقىرامىن. كۆوتالار تۋرالى شەشىم مۇلدە ىسكە العىسىز.

بۇدان باسقا ەۋروكوميسسيا دۋبلين كەلىسىمشارتىن قايتا قاراۋدى ۇسىندى. بۇل قۇجات بويىنشا بوسقىن ەۋرووداق اۋماعىنا وتۋگە مۇمكىندىك جاساعان ەلگە باسپانا بەرۋ تۋرالى ءوتىنىش ۇسىنۋعا مىندەتتى. نەگىزى مۇنداي شەكتەۋ گرەكيا مەن يتالياعا باعىتتالعان. سەبەبى ميگرانتتار كوپ جاعدايدا وسى ەلدەر ارقىلى كەلىپ جاتىر.

ليۋبومير زاورالەك، چەحيا سىرتقى ىستەر ءمينيسترى:

- بۇل ۇسىنىستا ايتىلعان قاعيداتتار ميگرانتتاردى قابىلداۋ ەرەجەسىنە كەرەعار. مۇنى كەلىسىمشارت دەپ اتاۋعا مۇلدە بولمايدى. سوندىقتان ەۋروكوميسسيانىڭ بۇل باستاماسى مەنى ءتۇرلى ويعا جەتەلەيدى.

زاڭسىز كوشى- قون ماسەلەسى ەۋرووداق ءۇشىن تۇيتكىلگە اينالدى. سوڭعى كەزدەرى بوسقىندار لەگى ازايعانىمەن، گەرمانيا، اۆستريا، فرانسيا مەن بەلگيا سياقتى ءبىرقاتار ەل شەكارا باقىلاۋىن تاعى جارتى جىلعا ۇزارتتى.

www.24.kz