ايشا: وتباسىن ساقتاپ قالعىسى كەلگەن ايەل ستيۋاردەسساداي بولۋى ءتيىس
ول اياۋلى انا مەن سۇيىكتى جاردىڭ ستيۋاردەسساعا ۇقساۋى كەرەكتىگىن ايتتى.
بۇل تۋرالى Stan.kz سايتى حابارلايدى.
ايشا قىز بۇركىتتى ءبىر ەمەس، ەكى جىل قاتارىنان جۇگىرتكەن. ەكەۋى ورتاق دوستارى ارقىلى مەرەكەلىك وتىرىستاردىڭ بىرىندە تانىسقان. بۇركىت ءبىر كورگەننەن عاشىق بولىپ ەكى جىل بويى گۇل شوقتارىن جىبەرىپ جۇرگەن. ايشا قىز ەكى ۇسىنىسىنان باس تارتىپ، سوڭعى ۇسىنىستى ءوزى جاساعان. ماحابباتتارى وسىلايشا تاعدىردىڭ سىنىنا توتەپ بەرىپ قوسىلعان جاس جۇبايلار وتباسىندا كەلەڭسىز وقيعالار بولىپ تۇراتىنىن جاسىرمايدى. دەسە دە، ايشا قاجەت كەزدە كىشىرەيىپ، وتباسىنىڭ بەرەكە-بىرلىگىن ساقتاپ قالۋعا تىرىساتىنىن ايتتى.
«وتباسىن ايرانداي ۇيىتىپ، ونىڭ بەرەكەسىن كىرگىزەتىن تەك ايەل. ءبىز ايەل مەن ەركەكتىڭ وڭ جانە سول جاق جارتىشارلارىنىڭ تۇرلىشە قىزمەت اتقاراتىنىن بىلەمىز. ايەل ادامدا اتالعان جارتىشاردىڭ ەكەۋى دە ءبىر ۋاقىتتا ىسكە قوسىلىپ تۇرادى. ال ەر ادامدا كەرىسىنشە ەكى جارتىشارى كەزەكپەن جۇمىس ىستەيدى. بۇل جارتىشارلاردىڭ ءبىرى سانالى ويلاۋ بىلۋگە، ەكىنشىسى ەموتسياعا جاۋاپ بەرەدى. ياعني، ايەل ادام سەزىمگە بەرىلىپ تۇرىپ سانالى شەشىم قابىلداي الادى. ال ەر ادامنىڭ بويىندا مۇنداي قاسيەت جوق. ولار ەموتسيا مەن اقىلدىڭ اراسىندا بىرەۋىن تاڭداۋى ءتيىس. ەر ادام ەموتسياعا مۇلدە بەرىلمەسە، جۇيكەمىزدى جۇقارتىپ، ءسوزى ءزىلدى ەستىلۋى مۇمكىن. ارينە، وقىس وقيعالار كەزىندە مۇنىڭ پايداسى زور»، - دەپ ايشا مۇنداي قاسيەتتەردىڭ سۇيىكتىسىنە دە ءتان ەكەنىن ايتىپ ءوتتى.
ءارى قاراي ءانشى وقىس وقيعاعا تاپ بولعان كەزدە ايەل ادامنىڭ دۇربەلەڭگە سالىناتىنىن، وتباسىنىڭ ءار مۇشەسىنىڭ كوڭىل-كۇيى تىكەلەي ايەلگە بايلانىستى ەكەنىن تىلگە تيەك ەتتى.
«بارلىعىمىز دا ومىرىمىزدە ءبىر رەت بولسىن ۇشاقپەن الىس ساپارعا شىعىپ كوردىك. ادەتتە ۇشقىشتىڭ ۇشاقتى قالاي باسقارعانىن بايقامايمىز. بار بولعانى اعىلشىن ءتىلىن قانداي دارەجەدە مەڭگەرگەنىنە كوز جەتكىزەمىز. جول بويى قامقورلىق تانىتىپ، سۋسىن مەن تاماق اكەلىپ، تۇسىنىسپەۋشىلىكتەردى رەتكە كەلتىرىپ، اشۋلانىپ، قورىققان كەزدە جاستىق اكەلىپ بەرەتىن ءبىر جان بار. ول - ستيۋاردەسسا. ونىڭ قامقورلىعى ءدال ايەل ادامنىڭ ەرىنە، بالاسىنا دەگەن ماحابباتپەن پارا-پار. بۇل بويجەتكەننىڭ بويىنان اسقان جاۋاپكەرشىلىكتى بايقاۋعا بولادى»، - دەپ ايشا ءاربىر ايەل ادامعا ستيۋاردەسساعا ۇقساۋعا كەڭەس بەردى.
مۇنىڭ سەبەبىن ونىڭ ءاردايىم تازا ءارى سۇلۋ بولىپ جۇرەتىندىگىمەن بايلانىستىردى. «ول جان- جاعىنا نۇر شاشىپ، قۋانىش سىيلايدى. ءتارتىپ پەن جايلىلىقتى قامتاماسىز ەتەدى. سالونداعى اتموسفەرا سول بويجەتكەننىڭ قولىندا. سۇلۋ نەمەسە سانبيكە سەكىلدى ءمىنسىز بولۋ شارت ەمەس. بار بولعانى جان مەن جۇرەكتىڭ سۇلۋ بولۋى. ءبىزدىڭ دە ماقساتىمىز - ەڭ جاقسى ستيۋاردەسسا بولۋ. سول كەزدە عانا ءبىز سىي-قۇرمەتكە يە بولىپ، وتباسىمىزبەن باقىتتى كۇي كەشەمىز. ايەل ادام بارلىعىن رەتكە كەلتىرىپ وتىرسا، ەر ازامات الاڭسىز ۇشاقتى باسقاراتىن بولادى»، - دەيدى.
بۇدان وزگە وسى كۇندە سۇيىكتى جار اتانىپ ەكى بالانى قۇشاعىنا باسقان ايشا وتباسىنداعى نەگاتيۆتەن ارىلۋدىڭ ءتۇرلى ءتاسىلىن ۇسىندى. ونىڭ ايتۋىنشا، ايەل ادام ىشىندەگى نەگاتيۆتى سىرتقا شەلەكتەپ شىعارادى، ال ەر ادامدار ونى ەشكىم كورمەيتىن جەرگە بارىپ توگەدى. مۇنىمەن قاتار، ەر ازاماتتىڭ ماحابباتى وسىنداي ساتتە ايەلىنە قالاي كومەك كورسەتەتىنىمەن تىكەلەي بايلانىستى كورىنەدى.
«جارىن سۇيگەن ەر ونىڭ تابيعاتىن ءتۇسىنىپ، مۇنداي قىلىقتارىنا كوز جۇما قارايدى. ارتىنشا بارلىعىن ۇمىتىپ، ماحابباتپەن ۇيگە قايتا ورالادى. بۇل - دۇرىس باعىتتا ءوربىپ جاتقان قارىم- قاتىناس. ەر ادام كەلىپ-كەتىپ ۇنەمى قوزعالىستا بولۋى ءتيىس. ال ايەل ادامعا ەموتسياسىن سىرتقا شىعارۋ ءتان. وسىلايشا قۇدىقتىڭ سۋى تازارىپ وتىرادى»، - دەپ ايشا سۇيىكتىسىمەن قانشا رەنجىسسە دە، سوڭىندا تاتۋلاساتىنىن ايتتى.
كوپ ادام ءجۇزى جادىراپ، ساحنادا ءان سالعانداردىڭ باقىتتىڭ قۇشاعىندا ءومىر سۇرەتىنىن ايتادى. دەسە دە، جۇلدىزدار مۇنى جوققا شىعارىپ، ايشا سەكىلدى ءتۇرلى ءتاسىلدىڭ كومەگىنە جۇگىنەتىندىكتەرىن جاسىرمايدى.
