ن. نازاربايەۆ: ەلىمىزدىڭ تۇتاستىعىن قورعاۋ - وتان كۇزەتىندەگى ءاربىر ازاماتتىڭ قاستەرلى پارىزى
«سىزدەردى وتان قورعاۋشىلار كۇنىمەن، ۇلى جەڭىستىڭ 71 جىلدىق مەرەكەسىمەن شىن جۇرەگىمنەن قۇتتىقتايمىن. بۇل ەكى مەرەكە - اتا-بابامىزدان بىزگە ميراس بولعان ەلدىك ءداستۇردى جالعاستىراتىن كەزەڭ. «ەل ەرلەرىمەن ەڭسەلى»، دەيدى حالقىمىز. ءبىز كەشەگى ءباھادۇر بابالارىمىزدىڭ ەرلىكتەرىن قاستەرلەپ، ەلدىك جولىن جالعاعان ۇرپاقپىز. ەلىمىزدىڭ تۇتاستىعىن قورعاۋ - وتان كۇزەتىندەگى ءاربىر ازاماتتىڭ قاستەرلى پارىزى. ەلدىڭ تىنىشتىعىن، تۇراقتىلىعىن ساقتاۋ ءبارىمىزدىڭ قاسيەتتى بورىشىمىز. بەرەكەمىز بەن بىرلىگىمىزدىڭ ارقاسىندا اسپانىمىز اشىق، زامانىمىز تىنىش»، - دەدى ەلباسى.
مەملەكەت باسشىسى ءوز سوزىندە وسىنداي بەيبىت ومىردە دە ەرلىك جاساۋعا بولاتىنى دالەلدەنگەنىن باسا ايتتى.
«ءدال قازىر ارالارىمىزدا ەرەن ەرلىگىمەن دارالانعان بۇگىنگى كۇننىڭ باتىرلارى تۇر. ءوز باسىن قاتەرگە تىگىپ، ادامدى ورتتەن قۇتقارعان دانيار قاليەۆ ەرەن ەرلىكتىڭ ۇلگىسىن كورسەتىپ، «ەرلىگى ءۇشىن» مەدالىمەن ماراپاتتالدى. ارامىزدا ەل قاۋىپسىزدىگىن نىعايتۋعا زور ەڭبەك ءسىڭىرىپ جۇرگەن ازاماتتار دا بار. حالىقارالىق دەڭگەيدە تانىلعان مەرگەن قىزىمىز اسەم جاكەنوۆانى اتاپ وتكىم كەلەدى. جوعارى جەتىستىكتەرمەن كوزگە تۇسكەن ول «جاۋىنگەرلىك ەرلىگى ءۇشىن» مەدالىمەن ماراپاتتالادى»، - دەدى ق ر پرەزيدەنتى.
مەملەكەت باسشىسى بۇگىنگى ماراپاتقا يە بولىپ وتىرعان ازاماتتار اسكەري قىزمەتپەن بىرگە ازاماتتىق پارىزدى ابىرويمەن اتقارىپ جۇرگەندىگىن اتاپ ءوتتى.
«ەل سۇيسىنگەن ەرلىكتەرىڭىز بەن ەڭبەكتەرىڭىز ۇرپاققا ونەگە. جاستار وزدەرىڭىزگە قاراپ بوي تۇزەيدى. مەيرام قارساڭىندا ەرلىگىمەن، جەكە ەڭبەگىمەن ەلگە تانىلعان ازاماتتاردى ماراپاتتاۋ يگى ءداستۇرىمىز بولىپ كەلە جاتىر. جوعارى مەملەكەتتىك ماراپاتقا يە بولۋ سىزدەرگە قۇرمەتپەن بىرگە زور جاۋاپكەرشىلىك جۇكتەيدى. الداعى ۋاقىتتا دا وسى سەنىم مەن جاۋاپكەرشىلىك ۇدەسىنەن شىعادى دەپ سەنەمىن. ەڭبەكتەرىڭىز ەلگە ۇلگى بولا بەرسىن»، - دەدى ن. نازاربايەۆ.
اۆتور: مارلان جيەمباي
