تاريحتا تۇڭعىش رەت لوندون مەرى مۇسىلمان بولۋى مۇمكىن

استانا. قازاقپارات - لوندوندا 5- مامىردا مەر سايلاۋى ءوتتى. ۇلى بريتانيا تاريحىندا بۇل قىزمەتتى ءبىرىنشى رەت بريتاندىق مۇسىلمان يەلەنۋى مۇمكىن دەپ جازادى «ازاتتىق».

سايلاۋدا جەڭىستەن بىردەن-ءبىر ۇمىتكەر لەيبوريستىك پارتيا وكىلى، 45 جاستاعى ساديك حان سانالادى. ول لوندون مەرى كونسەرۆاتور بوريس دجونسوندى الماستىرۋى ىقتيمال.

سايلاۋالدى كامپانياسىندا ساديك حانعا «ەكسترەميزمگە قاتىسى بار بولۋى مۇمكىن» جانە «قوعامدىق قاۋىپتى ءوز ماقساتىنا پايدالانادى» دەگەن ايىپ تاعىلعان.

كونسەرۆاتورلىق پارتيا كانديداتى زاك گولدسميت سايلاۋالدى كامپانياسىندا ساديك حاندى «راديكالدى» جانە «قاۋىپتى» دەپ اتاپ، ونى يسلامشىل ەكسترەميستەرگە «تىرەك بولادى، ءتىپتى قورعاۋ جاسايدى» دەپ ايىپتاعان. گولدسميتتىڭ پىكىرىن كونسەرۆاتيۆتىك پارتيا جەتەكشىسى، پرەمەر-مينيستر دەۆيد كەمەرون، باسقا پارتيا وكىلدەرى قوشتاعان.

بۇرىنعى قۇقىق قورعاۋشى، پاكىستاننان شىققان اۆتوبۋس جۇرگىزۋشىسىنىڭ ۇلى ساديك حان «بارلىق لوندوندىقتار مەرى» بولۋعا ۋادە ەتكەن.