ن. نازاربايەۆ ۇكىمەتكە جەر قاتىناستارىن رەتتەۋ سالاسىنداعى سالالىق قىزمەتىن اۋىل شارۋاشىلىعى مينيسترلىگىنە بەرۋدى تاپسىردى
بۇگىن اقوردادا وتكەن كەڭەس بارىسىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.
ەلباسى جەر كودەكسى جۇمىستارىنا جاۋاپتى ەكى مەملەكەتتىك ورگان - اۋىل شارۋاشىلىعى مەن ۇلتتىق ەكونوميكا مينيسترلىكتەرىنىڭ وزدەرىنىڭ الدىنا جۇكتەلگەن مىندەتتى ورىنداي الماعاندىعىنا باسا نازار اۋداردى.
«بۇل مينيسترلىكتەر جامان جۇمىس ىستەدى، دەي المايمىن. ءبىراق، ءوز ۇستانىمدارىن تۇسىندىرۋمەن، ونىڭ بارلىعىنا تۇسىنىكتى بولىپ، قابىلدانۋىمەن اينالىسقان جوق»، - دەدى ق ر پرەزيدەنتى.
وسى رەتتە مەملەكەت باسشىسى قىزمەتتەرىندە ولقىلىق جىبەرگەن ۇلتتىق ەكونوميكا ءمينيسترى ە. دوسايەۆتىڭ وتستاۆكاسىن قابىلداپ، اۋىل شارۋاشىلىعى ءمينيسترى ا. مامىتبەكوۆتىڭ قىزمەتىنە تولىق ساي كەلمەيتىندىگىن جاريا ەتتى. مۇنان بولەك، ۇلتتىق ەكونوميكا ۆيتسە-ءمينيسترى ق. وسكەنبايەۆتى قىزمەتىنەن بوساتۋ تۋرالى تاپسىرما بەرىپ، ۇلتتىق ەكونوميكا مينيسترلىگىنىڭ بەيىندى كوميتەتتەرىنىڭ باسشىلىق قىزمەتكەرلەرىنىڭ جانە باسقا دا جاۋاپتى تۇلعالاردىڭ قىزمەتىنە ساي كەلەتىندىگىن قاراستىرۋدى مىندەتتەدى.
سونداي-اق ق ر پرەزيدەنتى ۇكىمەتكە جەر قاتىناستارىن رەتتەۋ جونىندەگى سالالىق قىزمەتىن اۋىل شارۋاشىلىعى مينيسترلىگىنە بەرۋدى تاپسىردى.
اۆتور: مارلان جيەمباي
