الماتىلىقتار ۇلى جەڭىستىڭ تاريحي قۇجاتتارىن تاماشالادى - فوتو
تاريحي- قۇجاتتىق كورمەنى قازاقستان رەسپۋبليكاسى تاۋەلسىزدىگىنىڭ 25 جىلدىعىنا جانە ۇلى وتان سوعىسىنىڭ باستالعانىنا 75 جىل تولۋىنا وراي قازاقستان رەسپۋبليكاسى پرەزيدەنتىنىڭ ءارحيۆى ۇيىمداستىردى.
كورمەگە ەۆاكۋاتسيالانعان وندىرىستىك كاسىپورىنداردى، ەۆاكۋاتسيالانعان تۇرعىنداردى جايعاستىرۋ، رەسپۋبليكانىڭ وندىرىستىك سالالارى مەن اۋىل شارۋاشىلىعىن اسكەري قالىپقا كوشىرۋ كەزەڭدەرى كورىنىس تاپقان.
سونداي-اق، مادەنيەت ىستەرى جونىندە باسقارمانىڭ سوعىس كەزىندەگى قىزمەتى، كوركەم- ادەبي، بۇقارالىق- ساياسي جانە مەرزىمدىك باسىلىمداردى جەتكىزۋ تۋرالى قاۋلىلار، حاتتامالار، انىقتامالار، تىزىمدەر قويىلدى.
قۇجاتتىق ەكسپوناتتار اراسىندا 1941 -جىلعى 30 -ماۋسىمداعى ك س ر و حالىق كوميسسارلار كەڭەسىنىڭ ءتوراعاسى جانە ب ك (ب) پ و ك حاتشىسى ي. ستالين مەن ك س ر و حالىق كوميسسارلار كەڭەسى ءتوراعاسىنىڭ ورىنباسارى ۆ. مولوتوۆتىڭ مايدان شەبى جانىنداعى وبكومدار مەن وبلىستىق اتقارۋ كوميتەتتەرگە فاشيستەر باسىپ العان وڭىرلەردە استىرتىن ۇيىمدار مەن پارتيزاندىق جاساقتار قۇرۋ تۋرالى جەدەلحاتى، ج. بوزجانوۆ تۋرالى (8-گۆارديالىق ديۆيزيانىڭ پارتيالىق ۇيىمداستىرۋشىسى) ب. مومىش ۇلى قول قويعان قازاناما، زەڭبىرەك نىساناشىسى گ. كۋروپاتوۆتىڭ (الماتى قالاسىندا تۋعان) وقپەن تەسىلگەن جازبا كىتاپشاسى، «كولحوزنيك كازاحستانا» تانك كولونناسىن قۇرۋ ءۇشىن قاراجاتتىڭ ءتۇسۋى تۋرالى قۇجاتتار، قورعانىس قورىنا قازاق ك س ر تۇرعىندارىنان اقشا مەن باعالى زاتتاردىڭ ءتۇسۋى تۋرالى مالىمەت، قازاقستان حالقى مايدانعا جىبەرگەن كيىم- كەشەك، جاراق، ازىق- تۇلىك، جەم- ءشوپ كولەمى تۋرالى مالىمەتتەر بار.
اۆتور: ايبوتا جاپپاربەرگەن
