مەكتەپ قابىرعاسىندا ميلليونەر اتانعان قازاقستاندىق قۇپياسىمەن ءبولىستى
بۇل تۋرالى ول Blogpoint.kz سايتىندا بەرگەن سۇحباتىندا باياندادى دەپ جازادى stan.kz.
«العاش كاسىپكەرلىكتى باستاعان ادام مۇنداي كاسىپتىڭ ونداعانىن اشىپ كورۋى ءتيىس. بۇل تەك ونىڭ پايداسىنا بولماق. كليەنتتەرىنىڭ سانى از بولىپ، سەرىكتەستەرى ارىپتەستىكتەن باس تارتىپ، شىعىنعا ۇشىراپ، اتا-اناسى ۇيدەن قۋىپ، قالتاسىندا كوك تيىن قالماسا دا، مۇنىڭ بارلىعى جەتىستىككە جەتۋگە ىنتالاندىرادى. اتا-اناسى مەن تۋىستارى سياقتى قولداۋ-قورعانى بار ادامدار اشتىقتى سەزىنبەيىنشە، جانكەشتى تىرشىلىك كەشىپ، تابانى تىلىنگەنشە جۇمىس ىستەمەيدى»، - دەيدى جىگىت.
ارمان ون ءبىرىنشى سىنىپتا وقىپ ءجۇرىپ-اق نەبارى ءۇش اي ىشىندە ميلليون تەڭگە جيناعان. 13 جاسىندا ءبىرقاتار قاراعاندىلىق مەكتەپتەردىڭ كومپيۋتەرلەرىن جوندەپ، العاش اقشانىڭ ءدامىن سەزىنگەن جاس كاسىپكەر مەكتەپ بىتىرمەي جاتىپ قالانىڭ ءىرى دەگەن امبەباپ دۇكەندەرىنىڭ بىرىنەن كەڭسە تەحنيكاسىن ساتۋ جانە جوندەۋ بولىمشەسىن اشادى.
وسىلايشا اتا-اناسىنان اسىرا تابىس تاۋىپ، اقشا سىيلايتىن ەركىندىكتىڭ راحاتىن سەزىنەدى.
«ەگەر بىرەۋدىڭ قولىنان كەلسە، ول ءىستى مەن دە ىستەي الامىن. ءدال وسى وي مەنى العا جەتەلەپ، جىگەر وتىن جاندىرادى. الدەنەگە قىزىققاندا كۇن-ءتۇن دەمەي تەك سول ىسپەن شۇعىلدانىپ، شارشاعانىمدى سەزبەيمىن. ناقتى جۇيەم دە بار. جوبانى ىسكە اسىرىپ، وپەراتسيالىق سۇراقتاردى شەشۋ ءۇشىن بىلىكتى باسقارۋشى تاعايىندايمىن دا، ءوزىم تەك ءىستىڭ ستراتەگيالىق دامۋىمەن اينالىسامىن. تاياۋ كۇندەرى 300 دەن استام كومپانياسى بار يراندىق ميللياردەر جايلى ماقالا وقىعان ەدىم. مۇنشاما فيرمانى باسقارىپ وتىرىپ، ءوزى دە شاتاسىپ قالاتىن شىعار»، - دەيدى ارمان توقسانبايەۆ.
ارمان - قۇرعاق ءسوزدىڭ ەمەس، ناقتى ءىستىڭ ادامى. قازىر بيزنەس بويىنشا سەرىكتەسى ايبەك ەسەنوۆپەن بىرگە ۋاقىتىنىڭ باسىم بولىگىن «وتان پاتريوتى» وتاندىق ساعات برەندىنە ارناۋدا. ءبىر جىل بۇرىن عانا google translate ارقىلى جازىلعان بۋما-بۋما حاتتاردى ءتۇرلى ساعات فابريكالارىنا جىبەرگەن. ونىڭ العاشقى سەرىكتەسى ا ق ش- تا قازاقستاندىقتار اشقان Miami Watch Company بولدى.
ماقساتى جۇزەگە اسپايتىنداي كورىنگەنىمەن، قازاقستاندىق ساعاتتاردى جاساپ شىعارۋ شىنايى ومىردە كورىنىس تاپتى. ارماننىڭ كومپانياسىندا اي سايىن كەم دەگەندە 25 دانا ساعات ساتىلادى. عالامات دۇنيەلەردىڭ ءبارى قاتاڭ سىنعا ۇشىراپ، سونىڭ ارقاسىندا ءوز بيىگىنە جەتۋى زاڭدىلىق. بۇل رەتتە «وتان پاتريوتى» دا قالىس قالمادى.
«مەنىڭ تاراپىما ايتىلىپ جاتقان سىندار كوپ. ادامدارداعى پاتريوتتىق سەزىمدى بيزنەسكە اينالدىرىپ، ساعاتتىڭ دا باعاسىن اسپانداتىپ وتىر ەكەنمىن («وتان پاتريوتى» ساعاتتارى 110 مىڭنان 325 مىڭ تەڭگەگە دەيىن باعالانادى). شىنى كەرەك، كەي كەزدەرى وسى سىڭايلى سوزدەرگە قاتتى اشۋلانامىن. نە سەبەپتى ادامدار بىرەۋدىڭ باستاعان ىسىنە قۋانىپ، تىلەۋلەس بولا المايدى؟ بارلىعىنىڭ تەك كەمشىلىك ىزدەۋىنىڭ سەبەبى نەدە؟»، - دەپ رەنىشىن ءبىلدىردى كاسىپكەر.
كوبىنە ارمان ۇسىناتىن قازاقستاندىق ساعاتتار قۇراۋىش بولشەكتەرىنىڭ بارلىعى شەتەلدەن الىناتىندىقتان، نەگىزى قازاقستاندىق بولماعانى سەبەپتى سىنعا ۇشىرايدى ەكەن. مۇنى ارمان دا جوققا شىعارمايدى. الايدا كاسىپكەردىڭ سوزىنشە، قازىرگى جاعدايدا تولىعىمەن قازاقستاندا قۇراستىرىلعان ساعات جاساۋ مۇمكىن ەمەس كورىنەدى.
ءبىراز ۋاقىت بۇرىن «وتان پاتريوتى» ساعاتتارى ءۇشىن باۋ جاساي الاتىن كومپانيا تاپقانىمەن، وتاندىق باۋدىڭ الدەقايدا قىمباتقا تۇسەتىنى انىقتالعان.
سونىمەن قاتار، ارمان الەۋمەتتىك ماڭىزى بار جوبالاردى دا قولعا العان. سولاردىڭ ءبىرى - گيدروپوندى قوندىرعى. اتالعان قوندىرعىنىڭ ماقساتى دا قاراپايىم: تىگىنەن ورنالاسقان كوپ ساتىلى سورەلەردە جەمدىك ءدان ءوسىرۋ.
جوبانىڭ ارقاسىندا شارۋا قوجالىعى بار ادامدار جىلقى-سيىرلارى ءۇشىن ءوز جەرتولەلەرىندە جەم وسىرە الادى. جەم ءوسىرۋ پروتسەسىن تولىعىمەن اۆتوماتتاندىراتىن قوندىرعىنىڭ جۇمىسىنا جۇمسالاتىن ەلەكتر قۋاتى مەن سۋدىڭ دا مولشەرى ايتارلىقتاي تومەن.
«ەتتىڭ باعاسى جەمنىڭ قىمباتتىعى ءۇشىن اسپانداپ بارادى. مەنىڭ قوندىرعىم 5 كەلى داننەن 33 كەلى مينەرالدارعا باي جەم الۋ مۇمكىندىگىن بەرەدى. اپتا ىشىندە ءدان 25-30 سانتيمەترگە وسەدى. العاشقى ينۆەستيتسيا بىرنەشە ميلليون تەڭگەنى قۇرايتىندىقتان، قوندىرعى ۇساق شارۋاشىلىق يەلەرى ءۇشىن ءتيىمسىز دەر ەدىم. مىڭداعان مال باسىن ۇستايتىن شارۋاشىلىق يەلەرى تەك پايداسىن كورەرى انىق. بۇگىنگى كۇنى ءبيدايدىڭ كەلىسى 50 تەڭگە تۇرادى، ال دايىن جەمنىڭ باعاسى - 10 تەڭگە»، - دەگەن ارمان ءوز جوباسىن بۇگە-شىگەسىنە دەيىن بايانداپ بەردى.
سونىمەن قاتار جاس ميلليونەر بيزنەس الەمىنە قادام باسقان كاسىپكەرلەرگە ءوز كەڭەسىن بەرەدى.
«بار ادامدى قويىن داپتەر ارناۋعا ۇيرەتكىم كەلەدى. كۇن سايىن كۇننىڭ رەتى مەن شەشىلۋى ءتيىس ىستەرىڭىز بەن تاپسىرمالارىڭىزدى جازىپ وتىرىڭىز. ەگەر تاپسىرما شەشىمىن تاپپاسا، ەرتەڭگى كۇنگە جازىپ قويۋ قاجەت. ءاردايىم جاڭا قوڭىراۋلار ءتۇسىپ جاتادى. ولاردىڭ بارلىعىن ەستە ۇستاۋ مۇمكىن ەمەس. سوندىقتان مىندەتتى تۇردە قويىن داپتەرگە جازىپ قويعان دۇرىس. ول - ەسكى ويلاردىڭ جيناقتالۋى ەمەس، جاڭا يدەيانىڭ باستاماسى.
ورىندادىڭ با، بىردەن سىزىپ تاستا. ناتيجەسى - جادىڭىزعا ارتىق سالماق تۇسىرمەي، جۇيكە جۇيەڭىزدىڭ تىنىشتىعىن قامتاماسىز ەتەسىز. وعان قوسا، بارلىق شارۋالارىڭىز دۇرىس ءارى ءوز رەتىمەن ىسكە اسىپ جاتادى»، - دەپ ارمان بيزنەس الەمىنە قادام باسقان كاسىپكەرلەرگە كەڭەس بەرەدى.
