شاكارىم قۇدايبەردى ۇلىنىڭ زاتتارى مۋزەيگە تابىستالدى
باسپا ءسوز كونفەرەنسياسىندا ەرنۇر ازىمبايەۆ شاڭىراعىندا ساقتالعان اقىن، فيلوسوف، تاريحشى شاكارىم قۇدايبەردى ۇلىنىڭ ءوزى تۇتىنعان جانە ءوز قولىمەن جاساعان باعا جەتپەس بۇيىمدارىن كوپشىلىك الدىندا سالتاناتتى تۇردە مۋزەيگە تارتۋ ەتتى. اتاپ ايتقاندا: سويىل، اعاشتان ويمىشتالىپ جاسالعان ساپتىاياق. سونىمەن قاتار شاقشا، فوتوسۋرەتتەر، كىتاپتار، شاكارىم قاجىنىڭ جاساعان ويۋ-ورنەك ۇلگىسىنىڭ كوشىرمەلەرى، سىرماق سىيعا تارتىلدى. مۋزەيگە سىيعا بەرىلگەن بۇل جادىگەرلەر باعا جەتپەس قۇندىلىعىمەن ەرەكشەلەنەدى. ش. قۇدايبەردى ۇلى جازىقسىز جازاعا ۇشىراعاننان كەيىن، جەكە ساقتالعان زاتتارى وسى كۇنگە دەيىن تابىلماي كەلىپ ەدى. ساياتقورادا جالعىز تۇرىپ، شىعارماشىلىقپەن اينالىسقان اقىننىڭ اڭشىلىقپەن، ساياتكەرشىلىكپەن اينالىسقانى بەلگىلى. سىيعا تارتقان وسى شوقپاردى تالاي رەت اڭشىلىقتا ۇستاعانى ءسوزسىز. سونىمەن بىرگە، ەرنۇر ازىمبايەۆ قۇندى جادىگەرلەردىڭ بۇگىنگى تاڭدا ەشبىر مۋزەيدە جوقتىعىن اتاپ ءوتتى.
«مەن، ازىمبايەۆ ەرنۇر مۇساباي ۇلى، توبىقتى ىرعىزباي، وسكەنبايدىڭ مىرزاتاي دەگەن اعاسىنان تارايمىز. مىرزاتايدان جۇمان، ونىڭ 9 ۇلىنىڭ بىرەۋى ءازىمباي. جۇمان اتامىز «اباي جولىنا» كىرگەن ادام. شاكارىم اتىلعاندا نەمەرە اعايىنى ازىمبايەۆ قىدىر، ازىمبايەۆ شىڭعىس اقىننىڭ كوپ دۇنيەلەرىن الىپ قالادى. بالا كەزىمدە شاكارىم توسەگىندە جاتىپ ءجۇردىم. مەن كىشكەنتاي كەزىمدە 10 جاسقا دەيىن مىنا ۇلكەن اكەمنىڭ بالاسى بولدىم، شاكارىم توسەگى دەپ قىدىر اتاممەن بىرگە جاتىپ ءجۇردىم. شوقپاردى ۇلكەن اتامىز قىدىر ءومىر بويى ۇستاپ وتىراتىنى كوز الدىمدا. «وي جارىقتىق شاكارىم» دەپ ايتىپ وتىراتىن. ول كەزدە ءبارى شاكارىم اتىن ايتۋعا قورقاتىن، ءبىراق ءبىزدىڭ ۇيدە قورىقپاي ايتا بەرەتىنبىز»، - دەدى ە. مۇساباي ۇلى.
جادىگەرلەردىڭ مۋزەي قورىنا تابىستالۋى - ەلىمىزدىڭ باي تاريحى ءۇشىن، ابايتانۋ، شاكارىمتانۋ، مۋزەيتانۋ ءۇشىن ەلەۋلى جاڭالىق.
باس قوسۋعا سەمەي قالاسىنان كورمە ۇيىمداستىرۋ ءۇشىن ارنايى كەلگەن ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۇراجايىنىڭ جەتەكشى عىلىمي قىزمەتكەرى م. مۇحامەدوۆا قازىرگى تاڭدا شاكارىمنىڭ جەكە زاتتارىنىڭ اباي مۇراجايىندا دا جوق ەكەندىگىن ايتا كەلىپ، بۇل جادىگەرلەردىڭ اسا قۇندىلىعىنا توقتالدى. سەمەي قالاسىنىڭ مادەنيەت جانە تىلدەردى دامىتۋ ءبولىمىنىڭ باستىعى كوپبايەۆ بەرىك كوپباي ۇلى باعا جەتپەس جادىگەرلەردى ساقتاپ جەتكىزگەن ە. ازىمبايەۆقا ريزاشىلىعىن ءبىلدىردى. باسپا ءسوز كونفەرەنتسياسىنا قالامىزدىڭ ب ا ق وكىلدەرى جانە مۇراجاي قىزمەتكەرلەرى قاتىستى.
«ازىرەت سۇلتان» قورىق مۇراجايىنىڭ ديرەكتورى ج. اۋباكىر اتالعان ءىس-شارانىڭ ماڭىزدىلىعىنا توقتالا كەتىپ، ەرنۇر اعامىزعا العىسىن ءبىلدىردى.
وسىلايشا، ۇرپاقتان-ۇرپاققا ساقتالىپ كەلگەن جادىگەرلەر ەندى مۋزەي تورىنەن ورىن الدى. بولاشاقتا «ابىزدان جەتكەن اسىل سىي» اكسياسى ءوز جالعاسىن تابادى.
