چەحيادا قازاق كينوسىنىڭ اپتالىعى وتەدى

 استانا. قازاقپارات - بيىل قازاندا چەحيادا قازاق كينوسىنىڭ اپتالىعى وتەدى. بۇل تۋرالى بۇگىن ق ر سىرتقى ىستەر مينيسترلىگىندە وتكەن باسپا ءسوز ءماسليحاتىندا قازاقستاننىڭ چەحياداعى ەلشىسى سەرجان ابدىكارىموۆ ءمالىم ەتتى.

 «بيىلدىڭ قازان ايىندا پراگادا قازاق كينوسىنىڭ اپتالىعىن وتكىزۋدى جوسپارلاپ وتىرمىز. ول ءۇشىن ءبىزدىڭ «قازاقفيلم» كينوستۋدياسىمەن ۇنەمى بايلانىستامىز. وسى رەتتە چەحيا قوعامىنا ءبىزدىڭ جاڭا تۋىندىلاردى، ەلىمىزدىڭ تاريحى تۋرالى فيلمدەردى، قازىرگى زامانعى لەنتالاردى ۇسىنباقپىز. اتاپ ايتقاندا، اپتالىقتا كورسەتىلەتىن تۋىندىلاردى ىرىكتەدىك، الايدا ناقتى بەكىتكەن جوقپىز» ، - دەدى س. ابدىكارىموۆ.

 ونىڭ سوزىنە قاراعاندا، قازاقستاننىڭ كينورەجيسسەرلەرى چەحيادا وتەتىن فەستيۆالدەر تۋرالى جاقسى بىلەدى جانە وسى شارالارعا ءجيى ساپارلاپ تۇرادى. جالپى، چەحيا الەمدىك كينويندۋسترياعا وزىندىك ۇلەسىن قوسىپ وتىرعان ەل رەتىندە مويىندالدى.

 

 اۆتور: رۋسلان عابباسوۆ