ورتالىق ازيا ەلدەرى باسشىلارىنىڭ سۇيىكتى سپورت تۇرلەرى قانداي؟ - فوتو
جاقىندا قازاقستاندىق دەپۋتاتتار مەملەكەتتىك قىزمەتكەرلەرگە دەنە شىنىقتىرۋ ءتارتىبىن ەنگىزۋدى ۇسىنعان بولاتىن. ولاردىڭ ويىنشا، بۇل ۇلت دەنساۋلىعىنا وڭ اسەرىن تيگىزەدى.
ال تۇركىمەنستان پرەزيدەنتى گۋربانگۋلى بەردىمۇحامەدوۆ بولسا، تىپتەن ءبىر اي بويى شەنەۋنىكتەردەن باستاپ، بالالارعا دەيىن ەل تۇرعىندارىنا جاتتىعۋلار جاساۋدى مىندەتتەگەن بولاتىن.
وسى تۇرعىدا ساياساتكەرلەردىڭ وزدەرى قانشالىقتى سپورتپەن شۇعىلدانادى؟ سونىمەن، ورتالىق ازيا كوشباسشىلارىنىڭ سۇيىكتى سپورت تۇرلەرىمەن تانىس بولىڭىز.
نۇرسۇلتان نازاربايەۆ (قازاقستان)
نۇرسۇلتان نازاربايەۆ قازاقستاننىڭ سپورتتىق دەرجاۆاعا اينالۋى ءۇشىن بارىن سالۋدا. ءتىپتى كەي سپورت تۇرلەرىن ەلىمىزدە العاش بولىپ ەنگىزگەنىن دە جاسىرمايدى. جاس كەزىندە نازاربايەۆ ۆولەيبول وينايتىن. ال راكەتكانى العاش رەت قولىنا 40 تى القىمداعاندا العان. ال بۇگىندە كورتقا تۇراقتى تۇردە شىعىپ، جاقسى ناتيجەلەر كورسەتەدى.
قازاقستان دا بۇل سپورت تۇرىنەن ايتارلىقتاي العا باستى. اتر جانە WTA رەيتينگتەرىنە بىرنەشە وتاندىق تەننيسشىلەرىمىز ەنگەن.
55 جاسىندا نازاربايەۆ العاش رەت شاڭعى تەۋىپ ۇيرەندى. ونىڭ تاعى ءبىر قىزىعۋشىلىعى - گولف.
يسلام كارىموۆ (وزبەكستان)
يسلام كارىموۆ وزبەكستاندا بالالار سپورتىنىڭ دامۋىنا زور دەن قويادى. ول ءۇشىن ەلدە ارنايى قور اشىلعان. ال كارىموۆتىڭ ءوزى بولسا، ۇلكەن تەننيس وينايدى. ودان بولەك شاحماتقا اۋەستىگى جوعارى.
المازبەك اتامبايەۆ (قىرعىزستان)
المازبەك اتامبايەۆ سپورتتىق شەبەرلىكتەرىمەن ماقتانا المايدى. ءبىر كۇنى ودان قاي سپورت ءتۇرىن ۇناتاسىز دەپ سۇراعانىندا، تۋريزم دەپ جاۋاپ بەرگەن بولاتىن. دەگەنمەن ونىڭ سپورتتىق تۋريزممەن شۇعىلدانعانىن كورگەن ادام تابىلمادى. بۇدان بولەك المازبەك اتامبايەۆ بالا كەزىندە شاحماتتى قاتتى جاقسى كورگەنىن العا تارتتى.
ەمومالي راحمون (تاجىكستان)
تاجىكستاننىڭ سپورتتىق جەتىستىكتەرى تۋرالى ءبۇتىن ءبىر كىتاپ جاريالانعان - «ەمومالي راحمون: ۇلت دەنساۋلىعى - باعا جەتپەس بايلىق». ول كىتاپتان ەمومالي راحموننىڭ ءتۇرلى سپورت تۇرلەرىمەن شۇعىلداناتىنىن بىلۋگە بولادى. ونىڭ ىشىندە فۋتبولدى ەرەكشە جاقسى كورەدى. ۇلتتىق جەكپە-جەك ءتۇرى - گۋشتينگيريمەن دە اۋەستەنەدى.
گۋربانگۋلى بەردىمۇحامەدوۆ (تۇركىمەنستان)
گۋربانگۋلى بەردىمۇحامەدوۆ اتپەن جۇرگەندى، ۆەلوسيپەد تەپكەندى، سۋ موتوتسيكلىنە وتىرىپ، بالىق اۋلاعاندى ۇناتادى. 1972-جىلى كلاسسيكالىق جەكپە-جەكتەن اشحاباد چەمپيونى اتانعان، ال 1973-جىلى اتىس بويىنشا تۇركىمەنستان چەمپيونى بولدى. بالا كەزىنەن اۆتوسپورتقا اۋەستەنەدى.
ناعىز تۇركىمەن رەتىندە ات شابىستارعا قاتىسادى. 2013-جىلدىڭ ساۋىرىندە ول، ءتىپتى 11 ميلليون دوللاردان استام قاراجات ۇتقان. ال ءبىر جولى مارە سىزىعىنا جەتكەندە، اتتان قۇلاپ تۇسكەن. الايدا قارۋلى قۇرىلىمدار بۇل وقىس جاعدايدان اقپاراتتىڭ تاراۋىنا كەدەرگى بولدى.
