افريكالىق ساياحاتشى قازاقتاردىڭ كەڭ پەيىلى مەن دارحان كوڭىلىنە ريزا بولدى

استانا. قازاقپارات - وڭتۇستىك افريكا رەسپۋبليكاسىنان كەلگەن ساياحاتشى دەۆيد كلينتون قازاقستاندىقتارعا ۇلكەن ريزاشىلىعىن ءبىلدىرىپ، ەلىنە ەرەكشە اسەرمەن ورالماق دەپ حابارلايدى «الماتى» ارناسى.

جيھانكەز ەلىمىزگە ەكى رەت كەلىپ، ەكى ساپارىندا دا ساتسىزدىككە ۇشىراعان. ءبىرىنشى رەت 2015-جىلى قوناققا كەلگەن. ءبىراق العاشقى ساپارى كەزىندە كولىگى بۇزىلىپ، جايسىز جاعداي ورىن الىپتى. سوندىقتان ماشيناسىن ەلىمىزدە تاستاپ كەتۋگە ءماجبۇر بولىپتى. 9 ايدان كەيىن ساياحاتشى قازاقستانعا قايتا ورالعان.

دەگەنمەن ەكىنشى ساپارى كەزىندە دە دەۆيد قيىندىققا تاپ بولعان. 22- ساۋىردە «قاراعاندى-الماتى» تاس جولىندا اپاتقا ۇشىراعان. كولىگى اۋدارىلىپ قالعان. بۇل جولى دا قازاقتاردىڭ كومەگىمەن دالادا قالماپتى. ابىروي بولعاندا، ءوزى ءدىن امان. جيھانكەز دەۆيد كلينتون 5 جىل كولەمىندە الەمدى ارالاپ كەلەدى.

باستاپقىدا ساياحاتى وڭتۇستىك امەريكادان باستالعان، كەيىن جوسپارىن تۇبەگەيلى وزگەرتىپتى. ءسويتىپ جاپونياعا باعىت العان. ساياحاتشى قازاقستاننىڭ تابيعاتىنا عاشىق بولعاندىعىن ايتادى. دەۆيد قازاقتاردىڭ كەڭ پەيىلى مەن دارحان كوڭىلىنە ءدان ريزا. ويتكەنى وقيعا ورىن الا سالعان كۇننەن باستاپ كوپتەگەن مەيىرىمدى جاندار كومەكتەسىپتى. ءتىپتى كەيبىرەۋلەرى قوڭىراۋ شالسا، ەندى بىرەۋلەرى ۇيلەرىنە قوناققا شاقىرعان.

«قيىن جاعدايعا تاپ بولعاندا، قاسىمنان تابىلعان قازاقستاندىق جاناشىرلارىما كوپتەن-كوپ العىس بىلدىرەمىن. ءبىر ەمەس، ەكى رەت وسىنداي جاعدايعا تاپ بولعانىمدا، جانىمنان تابىلدى. تاماعىن ۇسىنىپ، كيىم-كەشەك كيگىزدى. جاپان تۇزدە جالعىز قالمادىم. ال قازاقستان دەسە، كوز الدىما ارينە الدىمەن «اسىلعان ەت» ەلەستەيدى. ويتكەنى قازاقتاردىڭ ۇلتتىق تاعامدارى وتە ءدامدى. كەيىن ماعان الماتى قالاسىنداعى شىمبۇلاق، كوكتوبە سياقتى ورىندار قاتتى ۇنايدى. اماندىق بولسا، قايتا ورالامىن»، - دەدى ساياحاتشى دەۆيد كلينتون.

وسىعان دەيىن دەۆيد كلينتون كولىگىندەگى بار زاتىن ەل-جۇرتقا ساتپاق بولعان. ءبىراق ونى ەشكىم ساتىپ الماپتى. ەسەسىنە، كولىگىن تەگىن جوندەۋگە كومەكتەسىپ، ەلىنە قايتۋعا كومەكتەسكەن.