قازاقستاندا ەڭ باي ادامدار الماتى مەن استانادا تۇراتىن بولىپ شىقتى

بۇل تۋرالى «ك ت ك» ارناسى حابارلايدى.

ال،  قىزىلوردا مەن ماڭعىستاۋدا نەبارى ەكى-ءۇش ادام عانا مۇلكىن زاڭداستىرۋ تۋرالى ءوتىنىش جازعان. جالپى، ەكى جىلدىڭ ىشىندە ەلىمىز بويىنشا تۇرعىندار 910 بانكتىك شوت اشىپ، 590 ميلليارد تەڭگەنى زاڭداستىرىپتى. ۇلتتىق بانكتەگىلەردىڭ مالىمەتىنشە، اقشانى بەس جىل مىندەتتى تۇردە شوتتا ساقتاۋ جانە ونى قولما-قول شەشىپ الاردا مەملەكەتكە 10 پايىز جارنا تولەۋ تۋرالى تالاپ الىنعالى، جۇرتتىڭ زاڭداستىرۋعا دەگەن قىزىعۋشىلىعى بىردەن ارتقان.

اقشادان بولەك تۇرعىن ءۇي، ءتۇرلى عيماراتتار مەن كوممەرتسيالىق نىساندار جانە قۇندى قاعازدارىن زاڭداستىرۋدا. وسى ۋاقىتقا دەيىن 637 ميلليارد تەڭگەنىڭ دۇنيەسى مەملەكەت ەسەبىنە الىنعان. بايلىعىن شەتەلدەردە جيناعان ميلليونەرلەر دە بۇل ناۋقاندى پايدالانىپ ءزاۋلىم ءۇي، جەر، بيزنەس، قۇندى قاعازدارىن زاڭداستىرىپ الۋدا.

«دامىعان ەلدەر، بىرىككەن اراب امىرلىكتەرىنەن، ەۋروپادان بار. نەگىزى كوبىنەسە رەسەي مەن وزبەكستاننىڭ شەكارالارىنىڭ قاسىندا. ءۇي العاندار بار، ءارتۇرلى، كەيبىرىنىڭ بيزنەستەرى بار. بارىنە راقىمشىلىق بەرەمىز. ارى قاراي ودان ەشقانداي سۇرانىس بولمايدى»، - دەيدى مەملەكەتتىك كىرىستەر كوميتەتىنىڭ باس ساراپشىسى نۇرشات سارسەنبايەۆ.