ەنەسى: كەلىنىم ءانشى ءمولدىر اۋەلبەكوۆا ەكەنىن بىلگەنىمدە جاقسى سەزىمدە بولمادىم

استانا. قازاقپارات - ءمولدىر اۋەلبەكوۆانىڭ ەنەسى باستاپقىدا ءانشى قىزدىڭ كەلىنى بولاتىنىنا قۋانباعان.

ونەر ادامىمەن بالاسىنىڭ ءسوز جاراستىرۋى قيىن بولادى دەپ ويلاپ، ۇلىن رايىنان قايتارماق تا بولعان كورىنەدى.

تانىمال ءانشى ءمولدىر اۋەلبەكوۆاعا 2015-جىلدىڭ 4- جەلتوقسانىندا سىرعا سالىنىپ، جات جەرگە ۇزاتىلعان-دى. ارتىنشا اراعا سەگىز كۇن سالىپ تويىن دۇركىرەتىپ اتاپ ءوتتى. جولداسىنىڭ ونەرگە ەش قاتىسى جوق. مۇنى جاقسى بىلەتىن ەنەسى ءانشى قىزبەن وتباسىن قۇرۋدىڭ قيىنعا سوعاتىنىن ايتىپ، باستاپقىدا بالاسىن رايىنان قايتارماق بولعان كورىنەدى.

«ارينە، بىردەن قولداپ، جاقسى سەزىمدە بولعان جوقپىن. سەن ول قىزدى جۇرەگىڭمەن شىن بەرىلىپ جاقسى كورسەڭ، جىلاتپاۋىڭ كەرەكسىڭ دەدىم بالاما. ساحنادا جۇرگەن كەز كەلگەن ادام سول جەردى ساعىنادى. ەگەر قىزدىڭ ونەرىنە كەدەرگى بولمايمىن، سونىڭ بارلىعىنا كونەمىن دەسەڭ، ءبىز قارسى بولمايمىز دەدىك. جۇرەگى قالاپ تۇرعان بالاعا قالايشا ونى الما دەپ ايتامىز. ونەر جولىنىڭ قيىن ەكەنىن، كۇن كەتىپ، ءتۇن كەلەتىنىن دە ايتتىق»، - دەيدى ەنەسى زەينەپ حانىم «بەنەفيس-شوۋ» باعدارلاماسىندا.

مۇنىمەن قاتار، زەينەپ حانىم ەلدىڭ ەركەسى بولعان ءانشى قىزدىڭ ءۇي شارۋاسىنا يكەمى بارىنا كۇماندانعان سىڭايلى. دەسە دە، وزىنە تيەسىلى شارۋانى تاپ-تۇيناقتاي ورىنداپ، بارلىق مىندەتىن دۇرىس ورىنداپ وتىرعانىن تىلگە تيەك ەتتى.

«كەلىندىك قىزمەتىن ىستەپ، تاڭەرتەڭ تۇرعاندا شايىن قويادى. ويتكەنى، يناباتتى، يبالى. جۇرەگىندە يماندىق قالاۋى بار. مۇنداي قىزدى كىم جەك كورەدى. ساحنادا تۇرعان تۇرىسىنىڭ وزىندە جاعىمسىز قىلىق جوق. سودان ۇنايدى. حالىقتىڭ جۇرەگىنەن شىققان ادام مەنىڭ دە جۇرەگىمنەن شىعادى»، - دەيدى ەنەسى.

ال جولداسى ارىستان مىرزا اتالعان باعدارلاماعا كەلمەگەن. ول جۇبايىنىڭ حالىق الدىنا شىعۋىنا جاعداي جاساپ، قولداۋ بىلدىرسە دە، كامەرانىڭ سىرتىندا ءجۇرۋدى ءجون كورگەن ەكەن.

«ول كىسىنىڭ ەشقانداي ونەرگە قاتىسى جوق بولعاننان كەيىن «مەن حالىقتىڭ الدىندا جۇرەتىندەي ونەر ادامى ەمەسپىن» دەگەن پىكىردە بولدى. وتاعاسى بولعاننان كەيىن ول كىسىنىڭ ءتىلىن الامىز»، - دەپ اۋەلبەكوۆا جولداسىنىڭ ەش سوزىنە قارسى كەلمەيتىندىگىن جەتكىزدى.

ءانشى وسى ۋاقىتقا دەيىن Instagram پاراقشاسىندا ەنەسىمەن بىرگە تۇسكەن سۋرەتىن سالعان بولاتىن. جەلى قولدانۋشىلارى ەنەسىنىڭ ءجۇزى سۋىق، مىنەزى قاتاڭ ەكەنىن ايتقان. الايدا ءمولدىر حانىم مۇنى جوققا شىعارىپ، وتباسىلىق ءومىردىڭ باقىت سىيلاپ، بارىنشا ءلاززاتقا بولەيتىنىن ايتادى.

Stan.kz