قىزىلوردالىقتار بىرلىك كۇنىن اتاپ ءوتتى - فوتو
«گۇلدەنگەن قازاقستان» ءانىن 150 بالا حورمەن شىرقاپ، «تاۋەلسىزدىككە 25 جىل» دەگەن جازۋى بار بۋما شارلار مەن 25 اق كوگەرشىن ۇشىرىلدى.
قىزىلوردا وبلىسىنىڭ اكىمى قىرىمبەك كوشەربايەۆ تۇرعىنداردى مەرەكەمەن قۇتتىقتاپ، جىلى لەبىزىن جەتكىزدى.
- بۇگىنگى تاتۋلىق پەن ىنتىماقتىڭ ءتول مەرەكەسى - قازاقستان حالقىنىڭ بىرلىگى كۇنى ەلىمىزگە تىنىشتىق پەن اۋىزبىرشىلىكتەن ارتىق تىلەرىمىز جوق. وتباسىنىڭ اماندىعى، دەندەرىڭىزدىڭ ساۋلىعى، ومىرلەرىڭىزدىڭ اجىراماس اجارى بولسىن. اسقاق ەلدىك مۇراتتارىڭىز ورىندالىپ، ورەلى ىستەرىڭىز جالعاسىن تاپسىن. الاشتىڭ اناسى، قازاقتىڭ كيەلى مەكەنى - سىر توپىراعىندا بىرلىكتىڭ بەسىگىن بىرگە تەربەتكەن ۇلتتار مەن ۇلىستاردىڭ تاتۋلىعى ءار شاڭىراققا بەرەكە سىيلاپ، بارشا قازاقستاندىقتارعا التىن تۇعىر بولسىن، - دەدى وبلىس باسشىسى.
بۇل مەرەكە بىرلىك پەن دوستىقتىڭ سيمۆولى عانا ەمەس، قازاقستاندى وتانىم دەپ سانايتىن بارشا ءتۇرلى ۇلت وكىلدەرىنىڭ مادەنيەتىنە، تىلىنە دەگەن ۇلكەن قۇرمەتتى كورسەتەدى. مۇنداي بىرلىك پەن ۇيلەسىمدىلىك ماڭگى بولسىن.
مەرەكەدە ءتۇرلى ەتنوستاردىڭ ۇلتتىق ەرەكشەلىكتەرىنە سايكەس بي بيلەپ، اندەر شىرقالدى.
سونداي- اق ورتالىق الاڭدا ۇلتتىق سپورت تۇرلەرىنەن جارىستار ۇيىمداستىرىلدى.
ايتا كەتەتىنى، مۇنداي شارالار قىزىلوردا وبلىسىنا قاراستى بارلىق اۋدانداردا دا كەڭ كولەمدە ۇيىمداستىرىلدى.
