08:30, 02 - مامىر 2016 | GMT +5
سيريالىق بوسقىن قىز برازيلياداعى وليمپيادا الاۋى ەستافەتاسىنا قاتىسادى
استانا. قازاقپارات - سيريالىق بوسقىن وتباسىنان شىققان 12 جاستاعى حانان حالەد داككا ەسىمدى قىز برازيلياداعى وليمپيادا الاۋى ەستافەتاسىنا قاتىسادى، دەپ جازادى ت ا س س.
بۇل تۋرالى جەكسەنبى كۇنى الداعى تامىز ايىندا ريو- دە- جانەيرودا وتەتىن باستى سايىستى ۇيىمداستىرشىلار حابارلاپ وتىر.
«سيريالىق بوسقىن قىزدىڭ وتباسى ەلدىڭ سولتۇستىك- شىعىسىنداعى يدليب قالاسىندا ءومىر سۇرگەن. وندا ازاماتتىق سوعىس بولدى. وسىدان كەيىن ولار يوردانياعا ءوتىپ، كەيىن برازيلياعا كەلگەن. بۇل كۇندە سان- پاۋلۋ قالاسىنا تۇراقتادى. قازىرگى ۋاقىتتا قىزدىڭ اناسى تاعى ءبىر بالانىڭ دۇنيەگە كەلۋىن كۇتىپ وتىر»، - دەلىنگەن «ريو-2016» ۇيىمداستىرۋ كوميتەتىنىڭ حابارلاماسىندا.
برازيلياداعى وليمپيادا ويىندارىنىڭ ەستافەتاسىن اشۋ قۇرمەتى ۆولەيبولدان ۇلتتىق قۇراما سپورتشىسى، وليمپيادا ويىندارىنىڭ ەكى دۇركىن چەمپيونى فابيانا كلاۋدينوعا بەرىلگەن.
