ۆەنەسۋەلادا حالىق شاراسىزدىقتان دۇكەندەردى توناۋعا كىرىستى

استانا. قازاقپارات - ۆەنەسۋەلاداعى كۇردەلى جاعداي جەرلىگىلىكتى حالىقتى شاراسىز كۇيگە تۇسىرگەن سىڭايلى. امالى تاۋسىلعان تۇرعىندار ساۋدا ورتالىقتارىن توناپ، ازىق- تۇلىككە جەتۋدىڭ توتە ءارى زاڭسىز جولدارىنا كوشتى.

  سالدارىنان كىرىستى بىلاي قويىپ، ءناپاقاسىن ارەڭ تاۋىپ وتىرعان كىشىگىرىم دۇكەنىنە الاڭداعان كاسىپكەرلەر زارداپ شەگىپ وتىر. زاڭ بۇزۋ فاكتىلەرى ەلدىڭ بىرنەشە وڭىرىندە تىركەلدى.   وسىعان بايلانىستى ءىرى قالالارداعى ءتارتىپتى قاداعالاۋعا ساربازدار جۇمىلدىرىلادى.  

  داعدارىس ۆەنەسۋەلانىڭ قورعانىس بيۋدجەتىن دە قىسقارتتى. بىلتىر رەسمي كاراكاس اسكەري شىعىندارىن 64 پايىزعا ازايتقان.

جالپى داعدارىستىڭ سالقىنى ۆەنەسۋەلادان بولەك الەم ەلدەرىن قىسپاققا الىپ تۇر. الپاۋىت دەرجاۆالاردىڭ ءوزى قيىن كەزەڭدى باستان وتكەرۋدە. ءىرى كومپانيالار مەن كونسەرندەردىڭ پايداسى ازايىپ، شىعىنى ارتۋدا.   الەمدىك داعدارىس دەگەندە بىردەن ەكونوميكاسى مۇناي باعاسىنا تاۋەلدى مەملەكەتتەر ويعا ورالادى.  سوڭعى كەزدەرى باسقا ەلدەرگە قاراعاندا ۆەنەسۋەلاداعى جاعداي ءجيى تالقىعا تۇسەدى. ءبىر كەزدەرى ميلليونداعان تۇرعىننىڭ جاعدايىن جاساۋعا جەتكەن ەل بيۋدجەتىنىڭ بۇگىنگى ءحالى ناشار.   جەرگىلىكتى حالىقتى ازىق- تۇلىكپەن قامتاماسىز ەتۋگە دە جاراماي تۇر. قارجى ۇنەمدەۋ ءۇشىن ەل بيلىگى ءتۇرلى قادامدارعا بارۋدا. مەملەكەتتىك قىزمەتكەرلەر ەندى اپتاسىنا ەكى كۇن عانا جۇمىس ىستەيدى. وقۋشىلاردىڭ ساباعى 4 كۇنگە دەيىن قىسقارتىلدى. ال ساراپشىلار بولسا: «بۇل ارەكەتتەن ناتيجە از»،  - دەسەدى.

  انا پەرەس، كاراكاس قالاسىنىڭ تۇرعىنى - ءبىز كۇنىنە ءبىر مەزگىل عانا تاماق ازىرلەيمىز. تۇسكى اس ىشسەك، كەشكى اس ىشپەيمىز. نەمەسە كەرىسىنشە. بالالارىمىزعا نان تابا الماي، قارا سۋعا قاراپ قالعان كۇندەرىمىز دە بولدى.  

 فەرناندا رودريگەس، كاراكاس قالاسىنىڭ تۇرعىنى - تۇرعىندار ادەتتەگى تاعامنىڭ ورنىنا ۇن جەي باستادى. دۇكەندەردە ەت ساتىلادى. ءبىراق ونى ساتىپ الۋعا حالىقتىڭ اقشاسى جەتپەيدى.

   ەكونوميكاسى مۇنايعا بايلانعان وزگە دە مەملەكەتتەردىڭ جاعدايى تۇسىنىكتى. ولار تىعىرىقتان شىعۋدىڭ ءتۇرلى جولدارىن ىزدەپ جاتىر. ءتىپتى ساۋد ارابياسى دا قارا التىنعا دەگەن تاۋەلدىلىكتەن ارىلۋدى كوزدەپ، 2030 -جىلعا دەيىنگى جوسپاردى بەكىتىپ تاستادى. بۇل قۇجاتقا سايكەس، ەلدە 2 تريلليون دوللارلىق دەربەس قور جاساقتالادى. «جوسپاردىڭ جۇزەگە اسۋىنا مۇناي باعاسى اسەر ەتپەيدى»،  - دەيدى بيلىك وكىلدەرى.  

مۇحاممەد بەن سالمان، ساۋد ارابياسىنىڭ ەكىنشى     مۇراگەر حانزاداسى  - ءبىز بۇل جوسپاردان مۇناي باعاسى 30 دوللاردان ارزانداپ كەتسە دە اۋىتقىمايمىز. ءبىراق قازىرگى مۇنايعا دەگەن سۇرانىستى ەسكەرسەك، باعانىڭ 30 دوللاردان تومەندەي قويۋى ەكىتالاي. مۇناي قۇنى 30 نەمەسە 70 دوللار بولسا دا، جوسپاردى جۇزەگە اسىرۋدى توقتاتپايمىز.

www.khabar