و. نازاروۆ: بوكس وزىنە ءتان تابيعي سۇلۋلىعىمەن تارتىمدى - فوتو
ال بۇگىندە ازيا بوكس كونفەدەراتسياسىنىڭ ۆيتسە- پرەزيدەنتى (ASBC)، قىرعىزستاننىڭ بوكس فەدەراتسياسىنىڭ پرەزيدەنتى ورزۋبەك نازاروۆ الماتىدا SK Boxing سپورت كەشەنىندە شەبەرلىك سىنىبىن وتكىزدى. وعان بەس جاستان جوعارى 70-كە جۋىق بوكسشىلار قاتىستى.
سپورت كەشەنىنە كەلگەن ماسكەۋ وليمپياداسىنىڭ كۇمىس جۇلدەگەرى، AIBA ۆيتسە- پرەزيدەنتى، ازيا بوكس كونفەدەراتسياسىنىڭ پرەزيدەنتى سەرىك قوناقبايەۆ پەن ورزۋبەك نازاروۆتى الماتىلىق جاستار زور ىقىلاسپەن قارسى الدى. الدىمەن اتتارى اڭىزعا اينالعان بوكسشىلارمەن بىرگە سۋرەتكە ءتۇستى. ءارقايسىسى ورزۋبەك اعانىڭ WBA تۇجىرىمى بويىنشا جەڭىپ العان بەلبەۋىن ۇستاپ كورۋگە تىرىستى. كەيىن، شەبەرلىك سىنىبى بارىسىندا اتاقتى بوكسشىنىڭ ءاربىر قوزعالىسىن قالت جىبەرمەي باقىلاپ، ايتقان اقىل- كەڭەستەرىن زەيىن قويىپ تىڭدادى ءارى كورگەن- بىلگەندەرىن ءىس جۇزىندە جۇزەگە اسىرۋعا تىرىستى. ەكى ساعاتقا سوزىلعان شەبەرلىك سىنىبىنان كەيىن ازيانىڭ بوكس كونفەدەراتسياسىنىڭ ۆيتسە- پرەزيدەنتى «قازاقپارات» تىلشىسىنە سۇحبات بەردى.
- ورزۋبەك اعا، پاۆلودار قالاسىندا جاستار اراسىندا 4- ازيا چەمپيوناتىنىڭ شىمىلدىعى اشىلعالى تۇر. وسى بىرىنشىلىكتىڭ ەرەكشەلىگى مەن ماڭىزىنا توقتالساڭىز.
- بۇل وتە ماڭىزدى چەمپيونات! ويتكەنى، ول الداعى 2020 - جىلى توكيو قالاسىندا وتەتىن جازعى وليمپيادا ويىندارىندا ونەر كورسەتەتىن بوكسشىلاردىڭ العاشقى بايقاۋى ىسپەتتەس. ءبىز بۇل بىرىنشىلىكتە سولاردىڭ العاشقى اياق الىسىن باقىلايتىن بولامىز. قازىرگى 17 جاستاعى جاستار، 2020 - جىلى 20 جاستاعى تولىسقان بىلعارى قولعاپ شەبەرلەرىنە اينالادى. ونىڭ ۇستىنە قازاقستاندا بوكستان وتكىزىلەتىن حالىقارالىق تۋرنيرلەر وتە جوعارى دەڭگەيدە ۇيىمداستىرىلادى. پاۆلودارلىقتار بوكستى وتە جاقسى كورەدى. بۇل سەرىك كەرىمبەك ۇلى (قوناقبايەۆ - رەد. ) باسقاراتىن ازيا بوكس كونفەدەراتسياسىنىڭ جانە قازاقستان بوكس فەدەراتسياسىنىڭ قارقىندى جۇمىس ىستەپ جاتقاندىعىن كورسەتەدى.
- ورزۋبەك اعا، قازىرگى تاڭدا ازيا وڭىرىندە بوكس جالپى قالاي دامىپ جاتىر؟
- ازيا بوكسى ارينە ەۋروپالىق بوكستان ەرەكشەلەنەدى. بۇگىنگى تاڭدا ازيا بوكسى جاقسى دامىپ كەلەدى. قازىر ازيا بوكس كونفەدەراتسياسى قۇرامىندا 44 مەملەكەت بار. حالىقارالىق تۋرنيرلەرگە سولاردىڭ 20-25- ءى قاتىسادى. قالعان ەلدەر بەلگىلى ەكونوميكالىق، الەۋمەتتىك جانە باسقا دا سەبەپتەرمەن قاتىسا الماۋدا. ءبىراق، سول ماسەلەلەر شەشىلگەن سوڭ ارينە جارىستارعا تولىققاندى قاتىساتىن بولادى. قازىر، مىسالى ءۇندىستاندا، جاپونيادا بوكس قارىشتاپ دامىپ جاتىر. بۇل ەلدەردەن مىقتى بوكسشىلار شىعىپ جاتىر. سونىمەن قاتار، بەس مەملەكەت شوعىرلانعان ءوزىمىزدىڭ ورتالىق ازيا وڭىرىندە بوكستىڭ دەڭگەيىن جوعارى دەپ باعالاۋعا بولادى. بۇل وسى سالادا اتقارىلىپ جاتقان قاجىرلى ەڭبەكتىڭ ناتيجەسى دەپ بىلەمىن.
- ورزۋبەك اعا، قازىر بوكس ەرەجەسىنە كوپتەگەن جاڭالىقتار ەنگىزىلىپ جاتىر. ەرەجەلەر وزگەرۋدە. حالىقارالىق تۋرنيرلەرگە قاتىساتىن بوكسشىلاردىڭ جاس ەرەكشەلىكتەرىنە بايلانىستى تالقىلاۋلار ءجۇرىپ جاتىر. بيىل، ريو وليمپياداسىندا بوكسشىلار شارشى الاڭعا شلەمسىز شىعاتىن بولدى. وسى ماسەلەلەرگە بايلانىستى پىكىرىڭىزدى بىلگىمىز كەلەدى.
- جاس بوكسشىلاردىڭ حالىقارالىق تۋرنيرلەرگە قاتىسۋ مۇمكىندىگىن مەن قۇپتايمىن. بۇل قالىپتى جاعداي. مىسالى، 17 جاسىندا وليمپيادا چەمپيونى بولىپ جاتقاندار بار عوي. بوكستا مىنا ءبىر ەرەجەنى مىقتاپ ساقتاسا بولعانى. بالانى 10 جاسقا دەيىن عانا بوكسقا جىبەرۋگە بولمايدى. بۇل دالەلدەنگەن فاكت. ال 10 جاستان كەيىن بوكسپەن مىقتاپ اينالىسا بەرۋگە ابدەن بولادى. ونىڭ ۇستىنە ازيالىق جاستار ەۋروپالىق قۇربىلارىنا قاراعاندا ەرتە ەسەيەدى ەمەس پە!؟ ەگەر ولار 17-18 جاسىندا وليمپياداعا قاتىسىپ جاتسا، دەمەك ولار تالانتتى دەگەن ءسوز! مۇنى تەك قولداۋ كەرەك.
ال بوكسشىلاردىڭ ەندى شارشى الاڭعا شلەمسىز شىعۋىن مەن ءوز باسىم قىزۋ قولدايمىن. بوكس مىنەكي، ونداعان جىلداردان كەيىن اۋپىرىمدەپ ءوز ارناسىنا ءتۇستى- اي ايتەۋىر! ەندى جانكۇيەرلەر بوكسشىلاردى جاقسى تانيتىن بولادى. بوكس سايىسىنىڭ ءۇش مينۋتتان ءۇش راۋندقا سوزىلۋى - بۇل ناعىز كلاسسيكا! ەندى بوكس مۇلدەم باسقاشا باسقاشا سيپاتتا بولادى! بوكس بىرتىندەپ، ءوزىنىڭ باياعى شىنايى دا شيەلەنىستى، قاتال دا سۇلۋ، جاسىنداي جارقىلداپ، جالىنداعان تابيعي سيپاتىنا ەنىپ جاتىر. كەڭەس بوكسى وسىنداي بولاتىن. ازيانىڭ بوكس كونفەدەراتسياسى وسى باعىتتا حالىقارالىق اۋەسقوي بوكس قاۋىمداستىعىنا تالاي رەت حات جولداپ، ۇسىنىستار ايتىپ، كوپ جۇمىستار اتقاردى. نەگە؟ ويتكەنى، ءبىز قاشاندا بوكستىڭ وزىنە ءتان تابيعي سۇلۋلىعىن ساقتاعىمىز كەلەدى! ول سونىسىمەن تارتىمدى! ويتكەنى، بۇل بوكس!
- اڭگىمەڭىزگە راحمەت.
ايتا كەتەلىك، 2-8 - مامىر ارالىعىندا پاۆلودار قالاسىندا جاستار اراسىندا وتەتىن (18 جاسقا دەيىن) 4- ازيا چەمپيوناتىنا 20 مەملەكەتتەن 160 بىلعارى قولعاپ شەبەرى قاتىسادى. بۇگىن سەرىك قوناقبايەۆ پەن ورزۋبەك نازاروۆ پاۆلودارعا جول تارتادى.
اۆتور: ايبوتا جاپپاربەرگەن
