ن. نازاربايەۆ: ەل بىرلىگى جوعالسا، مەملەكەتكە قاۋىپ تونەدى - فوتو
سالتاناتتى شاراعا قاتىسقان نۇرسۇلتان نازاربايەۆ ەل بىرلىگى بولماسا مەملەكەتكە قاتەر توندىرەتىندىگىن جەتكىزدى.
«بىرلىك جوق جەردە بەرەكە دە بولمايدى. ويتكەنى ادام ءولتىرۋ، كۇرەس، توبەلەسپەن اينالىسۋعا تۋرا كەلەدى. ماسەلەن ۋكراينا ەكونوميكاسىن دامىتۋعا كوڭىل بولە الا ما؟ جوق. ۋكراينا كەڭەس وداعىندا ەكونوميكاسى بويىنشا ەكىنشى ورىنعا يە بولعان مەملەكەت ەدى. قازىرگى تاڭدا بۇل ەلدىڭ ەكونوميكاسى قازاقستاندىكىنەن ەكى ەسە كەم. ويتكەنى ەل ىشىندە اۋىزبىرشىلىك جوق. ولار ۇرىس- كەرىس، توبەلەستىڭ ماسەلەسىمەن اينالىسىپ ءجۇر» ، - دەدى ن. نازاربايەۆ.
مەملەكەت باسشىسى ءوز سوزىندە تاياۋ شىعىس پەن افريكاداعى، سيريا مەن يراكتاعى جاعدايدى مىسالعا كەلتىردى.
«سيريادا جۇزدەگەن ادام قىرىلىپ جاتىر. الماعايىپ زاماندا ءومىر ءسۇرىپ جاتىرمىز. اللاعا شۇكىر، ەلىمىزدە جۇزدەگەن ۇلت تاتۋ ءومىر ءسۇرىپ جاتىر. بارلىق مادەنيەت وكىلدەرى، ۇلت وكىلدەرى دامۋعا، ءوسىپ- ونۋگە قاقىسى بار. بىزدە مەيرامداردىڭ بارلىعى بىرلىكتە وتەدى. بۇگىن حريستيانداردىڭ پاسحاسىن تويلاپ جاتىرمىز. بارلىق حريستيانداردى مەرەكەمەن قۇتتىقتايمىن» ، - دەدى ول.
ءوز سوزىندە ەلباسى حالقىن بىرلىك كۇنىمەن قۇتتىقتاپ، ءار شاڭىراققا بەرەكە بىرلىك، تاتۋلىق تىلەدى.
اۆتور: گۇلميرا عوسمانالي
