ۇلتتىق مۋزەيدە ا. احمەدياروۆتىڭ «جالعىز دا كوپ» كورمەسى اشىلدى - فوتو
كورمەنىڭ سالتاناتتى اشىلۋىندا ءسوز العان ۇلتتىق مۋزەي ديرەكتورى دارحان مىڭباي اسحات احمەدياروۆتىڭ تۋىندىلارىنىڭ ەرەكشەلىگىنە توقتالىپ ءوتىپ، ونىڭ ونەرىنە شىعارماشىلىق تابىستار تىلەدى.
«اسحات احمەدياروۆتى كوركەم سۋرەت، فوتو سۋرەت، ۆيدەو، ينستاللياتسيا جانە پەرفورمانس سالالارىندا جۇمىستانىپ جۇرگەن تانىمال سۋرەتشى رەتىندە بىلەمىز. ونىڭ تۋىندىلارى ءبىزدىڭ ەلىمىزدە دە، شەت ەلدەردە دە جوعارى باعالانىپ ءجۇر. سەبەبى ونىڭ جۇمىستارىنىڭ وزىندىك بوياۋى بار، وزىندىك ءستيلى قالىپتاسقان. تيىسىنشە سۇرانىس تا جوق ەمەس. اۆتوردىڭ ءمان- مازمۇنى تەرەڭ كورمەسىنىڭ ۇلتتىق مۋزەيدە ءوتۋى ەلىمىزدىڭ كۇللى كوركەمدىك الەمىندەگى ماڭىزدى كەزەڭى بولماق دەپ ويلايمىن. سوندىقتان دا اسحاتقا شىعارماشىلىق تابىستار تىلەي وتىرىپ، ونەردىڭ بيىك شىڭدارىن باعىندىرۋىنا تىلەكتەسپىن»، - دەدى د. مىڭباي.
اسحات احمەدياروۆ ءوزىنىڭ اۆتورلىق كورمەسى تۋرالى ايتا كەلە، وسىعان دەيىن ونىڭ تالانتىنا قولداۋ كورسەتىپ كەلگەن ونەر جاناشىرلارىنا العىس ءبىلدىردى.
«ۇسىنىپ وتىرعان جۇمىستارىمنىڭ كوپشىلىگىن وسى كورمەگە ارنايى دايىندادىم. البەتتە، ونەردىڭ جولى وڭاي ەمەس. وسى ۋاقىتقا دەيىن كوپتەگەن سىنداردان ءوتىپ، ءومىرىمنىڭ ەڭ قيىن ساتتەرىن ارتتا قالدىردىم دەپ ويلايمىن. دەسە دە مەن قايتا ونەر جولىن تاڭدادىم. بەلگىلى ءبىر دەڭگەيگە جەتۋ ءۇشىن كوپ ەڭبەكتەنۋ قاجەت بولدى. بۇل رەتتە مەن ۇلتتىق مۋزەيدىڭ ديرەكتورى دارحان مىڭباي مىرزانىڭ، حالىقارالىق ونەردى دامىتۋ اسسوتسياتسياسىنىڭ نەگىزىن قالاۋشى دينا بايتاسوۆانىڭ ەرەكشە قولداۋلارىنا يە بولدىم. سول ءۇشىن دە بۇگىن كوپشىلىك الدىندا ول كىسىلەرگە ۇلكەن العىسىمدى بىلدىرگىم كەلەدى. ءبىزدىڭ قوعامدا دا ونەردى جوعارى باعالاي بىلەتىن وسىنداي جانداردىڭ بار ەكەنىنە قۋانىشتىمىن»، - دەدى ا. احمەدياروۆ.
ايتا كەتەيىك، ۇلتتىق مۋزەي بۇل كورمەنى قازاقستان رەسپۋبليكاسى مادەنيەت جانە سپورت مينيسترلىگى، استانا قالاسى اكىمشىلىگى جانە حالىقارالىق ونەردى دامىتۋ اسسوتسياتسياسىنىڭ قولداۋىمەن بىرلەسىپ وتكىزدى.
«جالعىز دا كوپ» كورمەسى 2016 -جىلعى 17 - ماۋسىمعا دەيىن جۇمىس ىستەيدى.
