الماتى كورەرمەندەرى ءۇش مەترلىك قولتىراۋىننىڭ ونەرىن تاماشالايدى

الماتى. قازاقپارات - الماتىعا «وتە جاقسى سيرك» باعدارلاماسىمەن ماسكەۋلىك سيرك كەلدى.

باعدارلامانىڭ باستى ەرەكشەلىگى كورەرمەندەر رەسەي سيرك ونەرىنىڭ جارىق جۇلدىزدارىنىڭ ونەرىن تاماشالايتىن بولادى. 1- مامىردا ونەر ۇجىمىنىڭ قايىرىمدىلىق كورسەتىلىمى باستالادى.

اتاپ ايتقاندا، انتون مەن ناتاليا پاپازوۆتار اربالەتپەن قىزداردىڭ توبەسىندەگى شاردى اتىپ، مەرگەندىكتەرىن سىنايدى.

بەلگىلى اۋە اكروباتتارى نادەجدا كراسوۆسكايا مەن ناتاليا ۆاسيليەۆا 8 مەترلىك بيىكتىكتەن ساقينا ءنومىرىن ورىندايدى.

سونداي-اق، نادەجدا كراسوۆسكايانىڭ ۇيرەتىلگەن مايمىلدارى، سەرگەي پريچينيچانىڭ يتتەرى مەن ايۋلارى قوسىلىپ ونەر كورسەتەدى.

الماتى كورەرمەندەرى العاش رەت قولتىراۋىنداردىڭ ونەرىنە كۋا بولادى. ۇزىندىعى 3 مەتر 20 سانتيمەتر بولاتىن ميسسيسيپي الليگاتورى مارتا ەڭ كۇردەلى تريۋكتەر جاسايدى.

ونى قوجايىنى تۋعان ساتىنەن باستاپ باعىپ كەلەدى. الليگاتور اپتاسىنا 10 كەلى ەت جەيدى.

«ولاردى ماحابباتپەن باعۋعا تىرىسامىن. زۇلىمدىققا زۇلىمدىقپەن جاۋاپ بەرەدى. اباي بولعان ءجون. نەگىزى ولار درەسسيروۆكاعا كونبەيدى. ولار قوجايىنعا ۇيرەنىپ الادى. جىرتقىشتىق تۇيسىگى ويانباس ءۇشىن قويىلىم بولار الدىندا بالاپان، بالىق، تاۋىق سياقتى جانى بار جانۋارلاردى بەرمەۋگە تىرىسامىن. مەن ءوز قولتىراۋىندارىمدى ەركىندىككە جىبەرسەم، ولار 1 تاۋلىك تە ءومىر سۇرە الماس ەدى»، - دەدى الەكساندر ورلوۆ.

«بۇگىن ءبىزدىڭ قازاق مەملەكەتتىك سيركىنە ارنايى ماسكەۋدەن جاڭا باعدارلامامەن قويىلىم كەلىپ جاتىر. 30- ءساۋىر مەن 29- مامىر ارالىعىندا ءوز ونەرىن الماتى تۇرعىندارىنا پاش ەتەدى. كۇندەلىكتى كەزدەسە بەرمەيتىن جانۋارلار، ۇلكەن شەبەرلەر ءوز ونەرلەرىن تارتۋ ەتەدى. كوپ ۇلتتى ەلدەن تۇراتىن ونەرپازدار ونەر كورسەتەدى. بەلارۋس، ۋكراينا، رەسەيدەن اتى ەلگە ءماشھۇر سيرك ارتىستەرى ونەر كورسەتەدى. كەلىڭىزدەر، تاماشالاڭىزدار»، - دەدى «قازاق مەملەكەتتىك سيركى» م ك ك ديرەكتورى باقىت بوكەبايەۆ.

اۆتور: گۇلميرا عوسمانالي