استانادا اسكەرگە اتتانعان جاستاردى سالتاناتتى تۇردە شىعارىپ سالدى - فوتو

استانا. قازاقپارات - بۇگىن ەلوردادا «اسكەرگە بارۋ - ازاماتتىق پارىزىم!» ۇرانىمەن قارۋلى كۇشتەرىنىڭ قاتارىنا جاڭادان شاقىرىلعانداردى سالتاناتتى تۇردە شىعارىپ سالۋ ءوتتى.

ق ر قورعانىس مينيسترلىگى باسپا ءسوز قىزمەتىنىڭ حابارلاۋىنشا، «وڭتۇستىك» وڭىرلىك قولباسشىلىعىنا قىزمەت ەتۋگە اتتاناتىن 52 ەلوردالىق شاقىرىلۋشى اسكەري انت قابىلداعاننان كەيىن ەلىمىزدىڭ قورعانىس قابىلەتتىلىگىن نىعايتۋ بويىنشا جاۋاپتى تاپسىرمالاردى ورىنداۋعا اتتانادى.

«بالالارىمىز ءبىزدىڭ باسىمىزدان وتكەن سۇراپىل سوعىستى كورمەسىن دەپ تىلەيمىن. انت قابىلدايتىن بوزبالالارىمىز لايىقتى قىزمەت ەتىپ، جاۋىنگەرلىك دايارلىق بويىنشا بىلىمدەرىن جەتىلدىرە ءتۇسسىن»، - دەدى ق ر پارلامەنتى ءماجىلىسىنىڭ دەپۋتاتى گەنەرال-لەيتەنانت باقىتجان ەرتايەۆ. بارلىق ۇمىتكەرلەر قاتاڭ ىرىكتەۋدەن ءوتتى. شاقىرىلۋشىلار جوعارى مورالدىق-ىسكەرلىك قاسيەتتەرگە يە، ورتاشا نەمەسە جوعارى ءبىلىمى، بويلارى مەن دەنە سالماقتارىنىڭ اراجىگى قالىپتى.

«قورعانىس مينيسترلىگىنىڭ اسكەري بولىمدەرىنە شاقىرىلاتىن بارلىق شاقىرىلۋشىلاردى جونەلتەر الدىندا ءبىز جيىن پۋنكتىندە ولاردى ءارى قاراي قىزمەت وتكەرۋلەرى ءۇشىن اسكەري كيىممەن جانە بارلىق قاجەتتىمەن قامتاماسىز ەتتىك. اسكەري بولىمدەردە تاجىريبەلى وفيتسەرلەر ساربازداردى اسكەري مىندەتتىڭ باستاپقى ىلىمىنە وقىتىپ قانا قويماي، ولار ءۇشىن جاڭا جاعدايدا بەيىمدەلۋلەرىنە كومەكتەسەدى. بۇگىن شاقىرىلۋشىلاردى سالتاناتتى تۇردە شىعارىپ سالۋ ءىس-شاراسىندا جاڭادان شاقىرىلعاندار ۇلى وتان سوعىسىنىڭ ارداگەرلەرى مەن ق ر قارۋلى كۇشتەرىنىڭ ارداگەرلەرىنەن باتا الدى»، - دەدى استانا قالالىق قورعانىس ىستەرى جونىندەگى دەپارتامەنتى باستىعىنىڭ ورىنباسارى پولكوۆنيك عاني ارتىقوۆ.

«مەنىڭ ويىمشا اسكەردە قىزمەت ەتۋ - ەلىمىزدىڭ ءاربىر ازاماتىنىڭ مىندەتى جانە ابىرويى. قازاقستان قارۋلى كۇشتەرىنىڭ قاتارىنا تۇسكەنىمە وتە قۋانىشتىمىن. بارلىق بوزبالالاردىڭ اتىنان ءوز وتانىما ادال جانە مۇلتىكسىز قىزمەت ەتەمىن دەپ انت ەتەمىن»، - دەدى شاقىرىلۋشى ارداق اركەنوۆ. «كوكتەم-2016» شاقىرۋ ناۋقانى قىزۋ ءجۇرىپ جاتىر. شاقىرىلۋشىلاردى سالتاناتتى تۇردە شىعارىپ سالۋ داستۇرگە اينالدى. جاڭادان شاقىرىلعاندار ءۇشىن ەكسكۋرسيا وتكىزىلدى. وندا ولار قازاق حاندىعىنىڭ قۇرىلۋى، قازاقستان تاريحىنىڭ كەڭەس ۋاقىتى مەن ۇلى وتان سوعىسى جىلدارىنداعى بىرەگەي اسكەري ەكسپوناتتارمەن، سونداي-اق اتىس قارۋ-جاراعىمەن، اسكەري-اۋە جانە اسكەري-تەڭىز كەرەك-جاراعىمەن ۇسىنىلعان قازىرگى ۋاقىتتاعى جادىگەرلەرمەن تانىستى. وسى اتاۋلى كۇنمەن شاقىرىلۋشىلاردى قۇتتىقتاۋعا تۋعان-تۋىسقاندارى مەن جاقىندارى، ۇلى وتان سوعىسىنىڭ ارداگەرلەرى، اۋعانستانداعى سوعىسقا قاتىسۋشىلار، قارۋلى كۇشتەرىنىڭ ارداگەرلەرى، قورعانىس مينيسترلىگىنىڭ وكىلدەرى، اسكەري-تەحنيكالىق مەكتەپ تاربيەلەنۋشىلەرى مەن اسكەري-پاتريوتتىق كلۋبتاردىڭ قاتىسۋشىلارى كەلدى.