ن. نازاربايەۆ: مەملەكەتىمىزدىڭ ەگەمەندىگىن قورعاۋ جولىندا قارۋلى كۇشتەردىڭ ماڭىزى زور - فوتو
بۇنداي پىكىردى ەلباسى نۇرسۇلتان نازاربايەۆ الماتىداعى «قايسار-2016» كەشەندى وقۋ-جاتتىعۋىنىڭ بارىسىن تاماشالاۋ كەزىندە ايتتى.
وقۋ-جاتتىعۋدان سوڭ جاۋىنگەرلەر مەن وفيتسەرلەر الدىندا سويلەگەن سوزىندە ەلباسى ولاردىڭ اسكەري دايارلىعىنا ريزاشىلىعىن ءبىلدىردى.
«سوڭعى كەزدە الەمنىڭ تۇكپىر-تۇكپىرىندە ءار ءتۇرلى اسكەري قاقتىعىستار ورىن الىپ جاتىر. سوندىقتان، ءبىز كەز كەلگەن جاعدايعا دايىن بولۋىمىز كەرەك. بۇل جەردە ەلىمىزدىڭ تۇتاستىعىن، تاۋەلسىزدىگىن ساقتاۋدا قارۋلى كۇشتەر ماڭىزدى ءرول اتقارادى. تاۋەلسىزدىك جىلدارىندا قازاقستاننىڭ قارۋلى كۇشتەرى ءوز دامۋىندا جاڭا دەڭگەيگە كوتەرىلدى. ءبىز زاماناۋي قارۋلى كۇشتەردى قۇرۋعا قول جەتكىزدىك. اسكەري قىزمەتتىڭ الەۋمەتتىك اسپەكتىلەرى دە ەداۋىر جاقساردى. مەن بۇعان جوعارعى باس قولباسشى رەتىندە تۇراقتى تۇردە كوڭىل ءبولىپ وتىرامىن. ال سىزدەردىڭ مىندەتتەرىڭىز - حالقىمىزدىڭ تىنىشتىعىن قورعاۋ، ەلىمىزدە بەيبىتشىلىك پەن تۇراقتىلىقتى قامتاماسىز ەتۋ. ۇلتتىق قاۋىپسىزدىك پەن ىشكى تۇراقتىلىقتىڭ سەنىمدى كەپىلگەرى بولۋ. بۇگىنگى الەمدىك داعدارىس كەزىندە ىشكى تۇراقتىلىقتى ساقتاي ءبىلۋ - ەل بولاشاعىنىڭ كەپىلى. ال بۇگىنگى «قايسار-2016» وقۋ-جاتتىعۋ بارىسىندا كورسەتكەن اسكەري دايارلىقتارىڭىزعا ريزاشىلىعىمدى بىلدىرەمىن»، - دەدى ەلباسى.
ايتا كەتەيىك، بۇگىن الماتى وبلىسىنىڭ زارەچنوە كەنتى ماڭىندا ورنالاسقان ق ر ۇلتتىق ۇلانى «بۇركىت» جاۋىنگەرلىك جانە ادىستەمەلىك دايىندىق ورتالىعىندا لاڭكەستىككە قارسى «قايسار-2016» كەشەندى وقۋ-جاتتىعۋى ءوتتى.
وعان قازاقستان رەسپۋبليكاسىنىڭ بارلىق كۇش قۇرىلىمدارىنىڭ ارنايى ماقساتتاعى بولىمشەلەرى قاتىستى. ولاردىڭ ىشىندە ق ر ۇلتتىق ۇلانىنىڭ «بۇركىت» ارنايى ماقساتتاعى بولىمشەسى، ق ر ءى ءى م «سۇڭقار» جانە «ارلان» بولىمشەلەرى، ق ر ۇ ق ك «ارىستان» ارنايى ماقساتتاعى جاساعى، سونداي-اق، ق ر ۇلتتىق ۇلانىنىڭ اسكەري بارلاۋ بولىمشەسى مەن ق ر مەملەكەتتىك كۇزەت قىزمەتىنىڭ «قالقان» بولىمشەسى بار. وپەراتسياعا بارلىعى 150 دەن استام جاۋىنگەرلەر مەن وفيتسەرلەر جۇمىلدىرىلدى.
بيىلعى «قايسار-2016» وقۋ-جاتتىعۋىنىڭ بارىسىن ق ر پرەزيدەنتى نۇرسۇلتان نازاربايەۆتىڭ ءوزى تاماشالادى.
