ورىس قىزعا ۇيلەنگەن قازاق جىگىتى وتباسىنداعى ءداستۇر تۋرالى باياندادى
وتباسىنداعى اعايىندى جىگىتتەردىڭ ومىرلىك جارى ورىس ۇلتىنىڭ وكىلدەرى.
ۇلكەن ۇلى ورىستان ايەل الاتىنىن ەستىگەندە اتا-اناسى ازداپ الاڭداۋلى بولعان دەپ جازادى «ليتەر».
ال كىشىسى تيمۋر اتا-اناسىمەن تانىستىرۋعا تامارانى الىپ كەلگەنى ەشكىمدى تاڭىرقاتا قويماعان.
«ءبىزدىڭ وتباسىندا ەر ادامداردىڭ ورىستان ايەل الۋى تاڭسىق دۇنيە بولماي كەتكەن. ماحابباتتا ۇلت جوق. ال مەنىڭ ءۇش اپكەم قازاق جىگىتتەرىنە تۇرمىسقا شىققان»، - دەيدى تيمۋر.
ول تاماراعا ۇسىنىس جاساعاندا، ءداستۇر بويىنشا اتا-اناسىمەن بىرگە تۇراتىندارىن بىردەن ەسكەرتكەن. تامارا بۇعان قارسىلىق تانىتپادى. تيمۋر قازاق جانە ورىس ءداستۇرى بويىنشا ەكى توي وتكىزگەن. ولار وتباسىندا بالاعا ەسىم بەرۋ كەزىندە عانا ماسەلە تۋىندايتىنىن ايتادى. سەبەبى، ەكى جاقتى دا رەنجىتپەي، ءبارىنىڭ كوڭىلىنەن شىعاتىن ەسىم تاڭداي الۋلارى كەرەك.
بۇل جاعدايدى ەركەتايەۆتار وتباسى «ەۆرەيلىك» جولمەن شەشۋگە كىرىسكەن. بالالارعا ءبىر ۋاقىتتا سلاۆيان جانە اراب ءتۇپتامىرلارى بار ەسىمدەر بەرىلەدى.
ۇلكەن قىزىن كاميلا، بىرنەشە كۇن بۇرىن دۇنيەگە كەلگەن كىشىسىن ميلانا دەپ قويدى. اكەسى باقىتتى ەكەنىن، دەگەنمەن ەندى ۇل دۇنيەگە كەلسە، تىپتەن باقىتتى بولارىن ايتادى.
ايتا كەتەرلىگى، وتباسى قازاق داستۇرىنە ساي ۇلكەن قىزىنىڭ تۇساۋىن كەستى. بۇل مەرەكەلى شاراعا ورىس اجەسى دە بەلسەندى اتسالىستى.
ال تىلگە كەلەر بولساق، ازىرگە كاميلا ورىس ءتىلىن ۇيرەنۋدە. ال قازاق تىلىنە باۋلۋ مىندەتىن اجەسى ءوز موينىنا العان. ەركەتايەۆتار سىيلاستىق پەن تاتۋلىقتى ۇيلەستىرە وتىرىپ، ءداستۇردى دە ساقتايتىن وتباسى ەكەندەرىن العا تارتتى.
