زاماناۋي سىبايلاس جەمقورلىققا قارسى ساياساتتى زەردەلەپ، قاجەتتىسىن قازاقستاندا پايدالانۋ - ماڭىزدى ءىس - ءا. بايمەنوۆ
«قازاقستان تاۋەلسىزدىگىن جاريالاپ، كونستيۋتسيالىق زاڭ قابىلعان 25 جىلدىڭ ىشىندە ءوزىن دەموكراتيالىق، زايىرلى، قۇقىقىقتى جانە الەۋمەتتىك مەملەكەت رەتىندە تانىتتى.
وسى ۋاقىت ارالىعىندا كوپتەگەن زاڭ قابىلداندى. ولار ەلىمىزدىڭ دامۋىنا سەپتىگىن تيگىزىپ كەلەدى. سول قۇقىقتىق اكتىلەردىڭ قاتارىندا «مەملەكەتتىك قىزمەت تۋرالى» جانە «سىبايلاس جەمقورىققا قارسى ءىس- قيمىل تۋرالى» زاڭدار دا بار. بۇگىن ءبىز الەمدەگى زاماناۋي سىبايلاس جەمقورلىققا قارسى ساياساتتاعى تاجىريبەلەر مەن جەتىستىكتەردى تۋرالى ويلارىمىزبەن بولىسەتىن بولاتىنبىز»، - دەدى شارا جۇمىسىن اشقان ق ر مەملەكەتتىك قىزمەت ىستەر ءمينيسترىنىڭ ورىنباسارى ايگۇل شيمانوۆا.
سونىمەن قاتار ول ەلىمىزدە قوعامدىق باقىلاۋ ينستيتۋتىن ەنگىزۋ، سىبايلاس جەمقورلىققا قارسى شارالاردى كۆازيمەملەكەتتىك جانە جەكە مەنشىك سەكتوردا جۇرگىزۋ، سىبايلاس جەمقورلىققا قارسى مادەنيەت قالىپتاستىرۋ جانە سىبايلاس جەمقورلىقپەن كۇرەس ماسەلەلەرى بويىنشا حالىقارالىق ىنتىماقتاستىقتى نىعايتۋ جۇمىستارىنىڭ جۇرگىزىلىپ جاتقاندىعىن باسا ايتتى.
ءوز كەزەگىندە مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەتىنىڭ ءتوراعاسى ءاليحان بايمەنوۆ مەملەكەتتىك اپپاراتتا حالىق اتىنان بيلىك جۇرگىزىپ، ورتاق مۇلىكتى باسقارۋ مۇمكىندىگىن العاننان باستاپ، وسى وكىلەتتىك پەن قارجىنى سالىق تولەۋشىلەر مەن حالىقتىڭ يگىلىگىنە ادال جانە ءادىل پايدالانۋ ءاردايىم وزەكتى ماسەلە بولىپ وتىرعاندىعىن اتاپ ءوتتى.
«سول سەبەپتى سىبايلاس جەمقورلىققا قارسى كۇرەس، وسى كەلەڭسىز ۇدەرىستەردىڭ الدىن الۋ - بارلىق مەملەكەتتەر ءۇشىن وزەكتى ءىس. بۇل باعىتتاعى شارالار الەمدەگى وزىق جەتىستىكتەرمەن قاتار ناقتى مادەني، تاريحي ەرەكشەلىكتەردى، الەۋمەتتىك- ەكونوميكالىق دامۋ دەڭگەيدى ەسكەرۋ ءتيىس. سوندىقتان دا زاماناۋي سىبايلاس جەمقورلىققا قارسى ساياسات تەتىكتەرىن زەردەلەپ، ونىڭ ىشىندەگى قاجەتتىسىن قازاقستاندا پايدالانۋ، مەملەكەتتىك اپپارات الدىنداعى ەلباسىمىز نۇرسۇلتان نازاربايەۆتىڭ قويعان مىندەتتەرىن جۇزەگە اسىرۋدا وتە ماڭىزدى ءىس بولىپ سانالادى»، - دەدى ول.
كونفەرەنسيا جۇمىسى بارىسىندا جەمقورلىقتىڭ الدىن الۋداعى وتاندىق جانە حالىقارالىق تاجىريبە زەردەلەنىپ، گەرمانيا، رەسەي، سينگاپۋر جانە گرۋزيا ەلدەرىندەگى سىبايلاس جەمقورلىق جاساۋ مۇمكىندىكتەر مەن شارتتارىن جويۋ تاجىريبەسى تالقىلانۋدا.
اۆتور: مارلان جيەمباي
