تۇرسىنبەك قاباتوۆتىڭ جۇبايى وتباسىلىق ءومىرى جايلى ايتىپ بەردى

استانا. قازاقپارات - قازاقستاننىڭ بەلگىلى شوۋمەنى تۇرسىنبەك قاباتوۆتىڭ جۇبايى «ناش كوستاناي» گازەتىنە بەرگەن سۇحباتىندا وتباسىلىق ءومىرى جايلى جانە جۇبايىنىڭ جۇرەگىن قالاي جاۋلاپ العانىن ايتىپ بەردى.

 جۇبايى ءمولدىر تۇرسىنبەكپەن ستۋدەنتتىك ءىس- شارا كەزىندە تانىسقانىن ەسكە الدى. 2000 -جىلى ول دا، ءمولدىر دە استاناعا كەلىپتى. ورالدىق دارىندى جاستى ەلوردالىق فيلارمونياداعىلار جۇمىسقا شاقىرعان ەكەن. ال بوس ۋاقىتىندا ول ءمولدىر ءبىلىم الىپ جۇرگەن اگرارلىق ۋنيۆەرسيتەتتىڭ كوڭىلدى تاپقىرلار كلۋبىنىڭ كومانداسىن باسقارىپ ءجۇرىپتى.

كونگرەسس-حوللدا ۋنيۆەرسيتەت كونسەرتى ءوتىپ جاتادى. ءمولدىر دومبىرامەن وركەستردە جەڭىمپاز بولادى، ال تۇرسىنبەك ءوز شاكىرتتەرىنە كومەكتەسەدى. سول ۋاقىتتا تۇرسىنبەك ارۋ قىزدى بايقاپ قالادى.

ولار ءبىر جارىم جىل بويى تانىس بولىپ جۇرەدى، ءبىراق ەكەۋى دە ىشتەي ءبىر-بىرىنە دەگەن سەزىمىن سەزگەن ەكەن، سودان كەيىن عانا كەزدەسە باستايدى دا، ءبىر جىل وتپەستەن وتاۋ قۇرادى.

«ارتىستەر سەزىمگە بەرىلگىش كەلەدى. تۇرسىنبەك ءوزىنىڭ قارىم-قاتىناسىمەن وزىنە قاراتتى - ول مەنى ءجيى تاڭعالدىرادى، توسىنسىيلار جاساعاندى ۇناتادى. مەن ول ۋاقىتتا جاتاقحانادا تۇراتىنمىن، مەنىمەن بىرگە ءتورت قىز تۇراتىن بولمەمىز ءۇشىنشى قاباتتا بولاتىن. 22.00 دە جاتاقحانا جابىلىپ قالاتىن، ال تۇرسىنبەك تەرەزە الدىندا كونسەرتتەر ۇيىمداستىراتىن: ءتىپتى ۇندىشە اندەر ايتىپ، ءبي بيلەدى. قىزداردىڭ بارلىعى ونىڭ ونەرىن كورۋ ءۇشىن تەرەزەگە تەلمىرەتىن. ول ۋاقىتتا ۇيالى تەلەفوندار جوق ەدى، كەشكى ۋاقىتتاردا مەن تەرەزەدە تۇرىپ، ول دالادا تۇرىپ اڭگىمەلەسەتىنبىز»، - دەيدى ءمولدىر.

قازىرگى ۋاقىتتا قاباتوۆتار وتباسىندا ءتورت بالا بار - ۇشەۋى قىز دا، بىرەۋى ۇل. ۇلكەن قىزى 12 جاستا، ول ديزاينەر بولعىسى كەلەدى، سۋرەت پەن تىگىن ۇيىرمەسىنە بارادى. ەكىنشىسى مۋزىكاعا اۋەس، فورتەپيانودا ويناپ، اكەسىنىڭ كونتسەرتتەرىنىڭ بىرىندە ونەر كورسەتكىسى كەلەدى. ال كىشى قىزدارى ءتورت جاستا، ۇل ەكى جاستا.

«تۇرسىنبەك ەكەۋمىز قاتال اتا- انا ەمەسپىز، بالالاردى جاقسى سوزدەرمەن، اشىق اڭگىمەمەن تاربيەلەۋ كەرەك دەپ ەسەپتەيمىز. قىزدارىمىز اكەسىن جاقسى كورەدى، ءتىپتى قۇپياسىن دا اشادى»، - دەيدى ءمولدىر.

ءمولدىر تۇرسىنبەكتىڭ ءبىرىنشى سىنشىسى ەكەنىن دە ايتتى: «اسحانادا شاي ءىشىپ وتىرعانىمىزدا ول ءوز ازىلدەرىن ماعان ايتىپ وتىرادى. ساحناداعىداي تۇرادى دا، ويلاپ تاپقاندارىن كورسەتەدى. سوڭىنا دەيىن كەدەرگى بولماي تىڭداپ، سوڭىنا دەيىن كورەمىن. ءتىپتى شارۋالارىم بولسا دا، ءبارىن تاستاپ، ونەرىن كورەمىن. مەنىڭشە، ءاربىر ايەلدىڭ ماقساتى - كۇيەۋى ءارتىس بولسا دا، قىزمەتكەر بولسا دا، پويىز ماشينيسى نەمەسە كۇزەتشى بولسا دا ومىرلىك سەرىگىن ءاردايىم قولداۋى كەرەك».

ءمولدىر قوستاناي وبلىسىنداعى امانگەلدى اۋدانىنا قاراستى ۇرپەك اۋىلىندا دۇنيەگە كەلگەن. 2000 -جىلى وقۋىن اياقتاپ، استاناداعى قازاق اگرارلىق- تەحنيكالىق ۋنيۆەرسيتەتىنىڭ ەكونوميكا فاكۋلتەتىنە وقۋعا تۇسەدى.

قىزدىڭ اكە- شەشەسى ەرتە قايتىس بولىپتى. اكەسى 58 جاستا، ال شەشەسى 45 جاستا باقيلىق بولعان ەكەن. ولاردىڭ وتباسىندا التى بالا بولعان. «ءبىزدىڭ بوس ۋاقىتىمىز بولمادى، ساباقتان كەيىن دومبىرا، حور، ءبي ۇيىرمەلەرىنە اسىعاتىنبىز»، - دەپ ەسكە الادى ءمولدىر بالالىق شاعىن. - ءاربىر بالا قوسىمشا ءۇش ساباققا باراتىن. ۇيىمىزدە ءارقاشان مۋزىكالىق اسپاپتار بولدى. 8-سىنىپتا وقىپ جۇرگەنىمدە مۇقانوۆتار وتباسىلىق انسامبلىندە ونەر كورسەتتىك، تۋعان اۋىلىمىزدا كونسەرتتەر ۇيىمداستىراتىنبىز».