ەلوردالىق كولىكتەر گازبەن جۇرەتىن بولادى

استانا. قازاقپارات - قالالىق ءماسليحاتتىڭ قۇرىلىس، ەكولوگيا، كولىك، ساۋدا جانە تۇرعىن ءۇي- كوممۋنالدىق شارۋاشىلىق جونىندەگى تۇراقتى كوميسسيانىڭ وتىرىسىندا ەلوردانىڭ ەكولوگيالىق قاۋىپسىزدىگى مەن قورشاعان ورتانى قورعاۋ ماسەلەلەرى تالقىلاندى.

 وتىرىس بارىسىندا قارالعان باستى ماسەلە كولىكتەردى گازبەن جۇرۋگە كوشىرۋ بولدى، دەپ حابارلادى قالالىق اكىمدىكتىڭ باسپا ءسوز قىزمەتىنەن.

استانا قالاسىنىڭ تابيعات رەسۋرستارى جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ساكەن يسايەۆتىڭ حابارلاۋىنشا، قالادا تۇراقتى تۇردە قورشاعان ورتاعا تالداۋ جۇرگىزىلەدى. جالپى العاندا، استانانىڭ اۋا باسسەينى جاعدايىنىڭ كورسەتكىشى حالىقتىڭ تىرشىلىك ەتۋىنە ەكولوگيالىق قولايلى جانە رەسپۋبليكا بويىنشا وڭىرلەر بولىنىسىندە اتموسفەرالىق اۋانىڭ لاستانۋى جاعىنان ەڭ تومەن دەڭگەيدى قۇرايتىن ءبىرىنشى توپقا جاتادى.

استانادا اتموسفەراعا شىعارىلاتىن لاس زاتتاردىڭ مولشەرىن ازايتۋعا باسا نازار اۋدارىلادى. جىل باسىنان بەرى 1316 جۇرگىزۋشى جازاعا تارتىلدى.

- جىلجىمالى قۇرالداردان شىعارىلاتىن لاس زاتتاردىڭ مولشەرىن قىسقارتۋ ماقساتىندا قالالىق كولىك ينفراقۇرىلىمى جاقسارتىلۋدا، ورامدار، جاڭا اۆتوموبيل جولدارى سالىنىپ، قازىرگى كوشەلەردى جوندەۋ جۇمىستارى جۇرگىزىلىپ جاتىر. وسىنىڭ بارلىعى قوزعالىس قارقىنىن، قيىلىستاردا كولىكتەردىڭ تۇرىپ قالۋىن، سايكەسىنشە، اتموسفەراعا شىعارىلاتىن لاس زاتتار مولشەرىن ازايتۋعا جول اشادى. ايتا كەتەيىن، اۋا ساپاسىن ارتتىرۋ ءۇشىن ۆەدومستۆوعا قاراستى كوممۋنالدىق كاسىپورىنداردىڭ 2965 كولىگى گازبەن جۇرەتىن بولادى. ۇستىمىزدەگى جىلدىڭ 1 - قاڭتارىنداعى جاعداي بويىنشا كوممۋنالدىق كاسىپورىنداردىڭ 318 ماشيناسى گاز وتىنىنا اۋىستىرىلدى، - دەدى ساكەن يسايەۆ.

مۇنىمەن قوسا، استانا قالاسى ءى ءى د اكىمشىلىك پوليتسيا باسقارماسى ۇستىمىزدەگى جىلدىڭ ءبىرىنشى توقسانىندا جەكە مەنشىكتى كولىكتەردى گازبەن جۇرۋگە اۋىستىرۋعا 1440 كەلىسىم بەرگەن. س. يسايەۆتىڭ ايتۋىنشا، ديزەل مەن بەنزينگە قاراعاندا، گاز وتىنى ارزانعا تۇسەدى.