قوعامعا جەر كودەكسىنە ەنگىزىلگەن تۇزەتۋلەردى ءتۇسىندىرۋدىڭ اۋقىمدى ءارى ماڭىزدى جۇمىستارى كۇتىپ تۇر - ق. توقايەۆ
بۇگىن پارلامەنت سەناتىندا «ە ا ە و جانە د س ۇ جاعدايىندا وتاندىق اگرارلىق سەكتوردىڭ باسەكەگە قابىلەتتىلىگىن ارتتىرۋ زاڭنامالىق رەتتەۋ جانە ءىس جۇزىنە اسىرۋ» اتتى پارلامەنتتىك تىڭداۋ بارىسىندا سەنات سپيكەرى قاسىم- جومارت توقايەۆ وسىلاي ءمالىم ەتتى.
ءسوز اراسىندا سەنات ءتوراعاسى قازاقستان ە ا ە و پەن د س ۇ اياسىندا لايىقتى باسەكەلەس بولۋى ءۇشىن اۋىل شارۋاشىلىعىنداعى تابيعي جانە گەوگرافيالىق باسىم الەۋەتتەردى پايدالانۋ قاجەتتىگىن اتاپ ءوتتى. ونىڭ ايتۋىنشا، بۇل رەتتە شەت ەلدىك نارىقتىڭ ۇدەرىسى ەسەپكە الىنۋى كەرەك.
«قازاقستاندا اۋىل شارۋاشىلىعى قىزمەتىنە پايدالانۋعا بولاتىن ايتارلىقتاي شارۋاشىلىق جەرلەرى ساقتالىپ وتىر. وندىرىستىك اينالىمعا قوسىمشا ونداعان ميلليون گەكتار جەرلەردى قوسۋعا بولادى. وسىعان بايلانىستى ۇكىمەت مۇشەلەرى، زاڭ شىعارۋشىلار مەن ۇكىمەتتىك ەمەس ۇيىمدار وكىلدەرى ءۇشىن قوعامعا جەر كودەكسىنە ەنگىزىلگەن تۇزەتۋلەردى ءتۇسىندىرۋدىڭ اۋقىمدى ءارى ماڭىزدى جۇمىستارى كۇتىپ تۇر. بۇل رەتتە اۋىل شارۋاشىلىعى جەرلەرى شەتەلدىكتەرگە ساتىلمايتىنىن ءتۇسىندىرىپ قويۋ جەتكىلىكسىز. ءبىز ءارتۇرلى ايلا- تاسىلدەر سحەماسىن قولدانا وتىرىپ، زاڭنىڭ وسى تالابىن اينالىپ ءوتۋدى بولدىرمايتىن قۇقىقتىق جانە باسقا دا قۇرالدار ارقىلى وسىناۋ ماڭىزدى ەرەجەنى جۇزەگە اسىرۋعا ءتيىسپىز. ەڭ باستىسى ەلباسىنىڭ جەرگە قاتىستى ۇلتتىق يۋريسديكتسياسىنا قاتىستى جانە جەردى پايدالانۋدىڭ تيىمدىلىگىن ارتتىرۋ تۋرالى تاپسىرعان مىندەتىن جۇزەگە اسىرۋعا ءتيىسپىز»، - دەپ اتاپ ءوتتى سەنات سپيكەرى.
اۆتور: قانات مامەتقازى ۇلى
