ا. مۇحامەدي ۇلى دجيۋ- دجيتسۋدان الەم چەمپيوناتىندا توپ جارعان قازاقستاندىق سپورتشىلاردى قۇتتىقتادى

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى ءابۋ-دابيدە وتكەن دجيۋ-دجيتسۋدان كاسىپقويلار اراسىنداعى الەم چەمپيوناتىندا تابىستى ونەر كورسەتكەن قازاقستاندىق سپورتشىلاردى قۇتتىقتادى.

«ءىرى حالىقارالىق دودادا ەل نامىسىن 135 سپورتشى قورعادى، بۇل ءبىزدىڭ ەلدە اتالعان سپورت ءتۇرىنىڭ قارقىندى دامىپ كەلە جاتقاندىعىن تاعى ءبىر مارتە دالەلدەيدى. قازىرگى تاڭدا سپورتتىڭ وسى تۇرىنە باۋليتىن سەكتسيالار ەلىمىزدىڭ 12 وبلىسىندا جانە ەكى قالاسىندا جۇمىس ىستەيدى ءارى وندا 10 مىڭنان استام قازاقستاندىق جاتتىعادى. بۇل وسى سپورتقا قىزىعۋشىلىقتىڭ وتە جوعارى ەكەندىگىن كورسەتەدى. سىزدەر بۇدان كەيىن دە حالىقارالىق دودالاردا ەل مەرەيىن ۇستەم ەتىپ، نامىسىمىزدى قورعايسىزدار دەپ سەنەمىز»، - دەپ اتاپ ءوتتى مينيستر.

ەسكە سالا كەتەيىك، دجيۋ-دجيتسۋدان قازاقستان قۇراماسى ءابۋ-دابيدە وتكەن كاسىپقويلار اراسىنداعى الەم چەمپيوناتىندا 51 ناگرادا ەنشىلەدى. وعان الەمنىڭ 100 ەلىنەن 5 مىڭنان استام سپورتشى قاتىسقان بولاتىن.