زەرتتەۋ: زەينەتكەرلىك جاسقا شىققان سوڭ جۇمىس ىستەۋ ءومىردى ۇزارتادى

استانا. قازاقپارات - عالىمدار زەينەتكە شىعۋدان كەيىن جۇمىس ىستەۋگە كەڭەس بەرەدى. ورەگون شتاتى ۋنيۆەرسيتەتى عىلىمي قىزمەتكەرلەرىنىڭ انىقتاۋىنشا، جۇمىس ىستەپ جۇرگەن زەينەتكەرلەردىڭ اراسىنداعى ءولىم بەلسەندى ەڭبەك قىزمەتىن جالعاستىرماعان قۇرداستارىنا قاراعاندا 11 پايىز سيرەك كەزدەسەدى.

ماماندار زەينەتكە شىعۋدىڭ ادامنىڭ دەنساۋلىعىنا قالاي اسەر ەتەتىنىن انىقتاۋ ماقساتىندا ارنايى زەرتتەۋ جۇرگىزگەن.

بۇل زەرتتەۋ 18 جىلعا سوزىلدى. 1992-2010 - جىلدار ارالىعىندا وعان ەڭبەك دەمالىسىنا شىققان شامامەن 12 مىڭ ادام قاتىستى.

زەرتتەۋ قورىتىندىسى بويىنشا، 65 جاستان كەيىن جۇمىس ىستەۋدى جالعاستىرعان ادامدار جۇمىس ىستەمەيتىن قۇرداستارىنا قاراعاندا 11 پايىز ۇزاق ءومىر سۇرگەنى انىقتالدى. ەگەر زەينەتكەرلەردىڭ دەنساۋلىق پروبلەمالارى بولعان جاعدايدا بۇل سان 9 پايىزدى قۇراعان.

تاۋلىگىنە 10-12 ساعاتتان جۇمىس ىستەپ ۇيرەنگەن ەگدە جاستاعى ادامدار وزدەرىن جاقسى سەزىنگەنى اتاپ وتىلەدى.

زەرتتەۋ جۇمىس ىستەۋدىڭ زەينەتكەرلەردىڭ قارتايعان اعزاسى مەن ويلاۋ قابىلەتىنىڭ قىزمەتىنە جاقسى اسەر ەتەتىنىن كورسەتتى، دەپ جازادى شەتەلدىك ب ا ق.