الماتى وبلىسىندا اۋىل شارۋاشىلىعى تاۋارلارىن دەلدالسىز وتكىزۋ جۇيەسىن دامىتۋ ماسەلەسى تالقىلاندى

استانا. قازاقپارات - الماتى قالاسى ماڭىندا ازىق- تۇلىك بەلدەۋىن دامىتۋ، ازىق- تۇلىكتى ءتيىمدى وتكىزۋ، اۋىل شارۋاشىلىعىنا يننوۆاتسيا ەنگىزۋ، ارنايى كووپەراتيۆتەر قۇرۋ.

وسى جانە وزگە دە ماسەلەلەر الماتى قالاسىندا وتكەن اگرارلىق كووپەراتسيا نەگىزىندە اۋىل شارۋاشىلىعى تاۋارلارىن تىكەلەي، دەلدالسىز وتكىزۋ جۇيەسىن دامىتۋ جونىندە ايماقارالىق كەڭەستە كەڭىنەن تالقىلاندى.

«اتامەكەن» ۇلتتىق كاسىپكەرلەر پالاتاسى باستاماشى بولعان شاراعا «اتامەكەن» ۇلتتىق كاسىپكەرلەر پالاتاسى پرەزيديۋمىنىڭ ءتوراعاسى تيمۋر قۇلىبايەۆ، الماتى قالاسىنىڭ اكىمى باۋىرجان بايبەك، الماتى وبلىسىنىڭ اكىمى اماندىق باتالوۆ قاتىستى.

وبلىس اكىمى ا. باتالوۆتىڭ ايتۋىنشا، الماتى اگلومەراتسياسى - كەڭ اۋقىمداعى ءوندىرىس پەن تۇتىنۋ نارىعىنىڭ جارقىن كورىنىسى، سوندىقتان ول الماتى وبلىسىنىڭ اۋىل شارۋاشىلىعى ماماندارى ءۇشىن ۇلكەن مۇمكىندىكتەرگە جول اشادى. بۇل ورايدا وڭىردە وندىرىلەتىن ونىمگە دەگەن سۇرانىستىڭ ارتۋىنا ەلىمىزدە العاشقى بولىپ الماتى وبلىسىندا قۇرىلا باستاعان اۋىل شارۋاشىلىعى كووپەراتيۆتەرى ۇلكەن كومەك ەتپەك.

- وتكەن جىلى الماتى وبلىسى اۋىل شارۋاشىلىعى ونىمدەرى جالپى ءونىمى كولەمىنىڭ %16 ىن ءوندىردى. ونىڭ نەگىزگى تۇتىنۋشىسى - الماتى قالاسى. قازىر ءبىز وندىرىستەردى ىرىلەندىرۋگە جۇمىس ىستەپ جاتىرمىز. سوڭعى 1,5 جىلدا وبلىستا 11 مىڭ ۇساق شارۋاشىلىقتى بىرىكتىرەتىن 137 اۋىل شارۋاشىلىعى كووپەراتيۆى قۇرىلدى. بۇل اۋىل شارۋاشىلىعى ونىمدەرىن ءوندىرۋ دەڭگەيىن ارتتىرۋ مەن ونى وتكىزۋدەن تۇسكەن پايدانى كوبەيتۋگە ىقپالىن تيگىزدى، - دەدى وبلىس اكىمى ا. باتالوۆ.

سونىمەن قاتار ءوڭىر باسشىسى قانت قىزىلشاسىنىڭ قايتا جاڭعىرتىلۋىنا ەرەكشە نازار اۋدارىلاتىنىن ايتتى. وتكەن جىلى وبلىستا 4020 گەكتار قانت قىزىلشاسى سەبىلىپ، ودان 125 مىڭ توننا ءتاتتى ءتۇبىر جينالدى، وعان قوسا توقتاپ تۇرعان كوكسۋ قانت زاۋىتى ىسكە قوسىلدى. ال بيىلعى جىلى 6400 گەكتار سەبۋ جوسپارلانىپ وتىر.

قانت قىزىلشاسىنىڭ ەگىس القابىنىڭ اۋقىمىن كەڭەيتۋ ءۇشىن وبلىستاعى يرريگاتسيالىق جۇيەلەردى قالپىنا كەلتىرۋ جۇمىستارى قولعا الىندى. وڭىردەگى يرريگاتسيا جۇيەلەرىنىڭ جالپى ۇزىندىعى 17 مىڭ شاقىرىمدى قۇرايدى. بۇل جۇيەلەردىڭ ءبىرشاماسى رەسپۋبليكالىق جانە كوممۋنالدىق مەنشىكتە، وعان قوسا يەسىز جۇيەلەر دە بار. قازىرگى كەزدە تۇگەندەۋ جۇمىستارى جۇرگىزىلىپ، 7,8 مىڭ شاقىرىم يەسىز كانالدىڭ 6,7 مىڭ شاقىرىمى كوممۋنالدىق مەنشىككە الىندى، پاسپورتتاۋ جۇرگىزىلىپ جاتىر.

- يرريگاتسيالىق جۇيەلەردى قالپىنا كەلتىرۋ، سۋارۋدىڭ زاماناۋي تاسىلدەرىن ەنگىزۋ، ونىڭ ىشىندە تامشىلاتىپ سۋارۋ، سول سياقتى اگروتەحنولوگيانىڭ بارلىق تالاپتارىن ساقتاۋ اۋىل شارۋاشىلىعى داقىلدارىنىڭ ونىمدىلىگىن ارتتىرۋعا مۇمكىندىك بەرەدى. ياعني الماتى قالاسى ماڭىندا ازىق-تۇلىك بەلدەۋىن قۇرۋ مەن دامىتۋ تۋرالى مەملەكەت باسشىسى جۇكتەگەن مىندەتتەردى ءتيىمدى ورىنداۋعا ىقپال ەتەدى، - دەپ قورىتىندىلادى ءسوزىن ا. باتالوۆ.

جيىن بارىسىندا بەلگىلى بولعانىنداي، بۇگىنگى كۇنى وبلىستا مامانداندىرىلعان كووپەراتيۆتەر قۇرىلىپ جاتىر. ولار الماتى قالاسىنىڭ ساۋدا نۇكتەلەرى مەن الماتى وبلىسىنىڭ فەرمەرلەرى اراسىندا «دەلدالسىز تىكەلەي قارىم- قاتىناستى» جولعا قويىپ، جيناۋ جانە وتكىزۋ ماسەلەسىمەن اينالىساتىن بولادى.

ءوز كەزەگىندە اگرارلىق سالا ماماندارى «تىكەلەي وتكىزۋ» تۋرالى ۇسىنىستى قولداپ، بۇل ورايدا فەرمەرلەردىڭ اگرارلىق ساۋاتتىلىعىن ارتتىرۋ قاجەتتىگىن دە تىلگە تيەك ەتتى.

جيىن قورىتىندىسىندا ساۋدا نۇكتەلەرى، وبلىستاعى اۋىل شارۋاشىلىعى كووپەراتيۆتەرى جانە «اتامەكەن» ۇلتتىق كاسىپكەرلەر پالاتاسى اراسىندا ءۇش جاقتى ىنتىماقتاستىق تۋرالى كەلىسىمگە قول قويىلدى.