قازاقستان تاياۋ شىعىستاعى ەڭ ءىرى كىتاپ جارمەنكەسىنە قاتىسۋدا
وعان الەمنىڭ 70 مەملەكەتىنەن 1000 نان استام باسپالار قاتىسىپ جاتىر، دەپ حابارلايدى ق ر س ءى م باسپا ءسوز قىزمەتى. 7 كۇن بويى وتەتىن جارمەڭكەنىڭ الاڭدارىندا 100 دەن اسا ءىس-شارالار، ونىڭ ىشىندە ايگىلى جازۋشىلارمەن، جاڭا كىتاپتاردىڭ اۆتورلارىمەن، ساياساتكەرلەرمەن كەزدەسۋلەر وتەدى.
ق ر ۇلتتىق مەملەكەتتىك كىتاپ پالاتاسى «قازاق ەنتسيكلوپەدياسى»، «ءداۋىر»، «قازاقپارات»، «الماتى كىتاپ»، «مەكتەپ» باسپا-پوليگرافيالىق مەكەمەلەرىمەن بىرلەسىپ قازاقستاننىڭ تاۋەلسىزدىگىنىڭ 25 جىلدىعىنا ارناپ «قازاقستان - ۇلى دالا ەلى» كورمە پاۆيلونىن ۇيىمداستىردى. كورمەدە قازاقستان تاۋەلسىزدىگىنىڭ قالىپتاسۋ تاريحىن، الەۋمەتتىك-ەكونوميكالىق دامۋىن، تابىسى مەن جەتىستىكتەرىن باياندايتىن 500 دەن استام كىتاپ ۇسىنىلدى.
ءابۋ-دابي حالىقارالىق كىتاپ جارمەڭكەسى جۇمىسىنىڭ بارىسىندا امىرلىكتەر اقىنى، پۋبليتسيست حابيب سايگ پەن «ءال-يتتيحاد» گازەتىنىڭ باس رەداكتورى مۇحاممەد ءال-حاممادي «كىتاپ مادەنيەتىنە قوسقان زور ۇلەسى ءۇشىن» مەدالىمەن ماراپاتتالدى.
سالتاناتتى ءراسىمدى اشۋ بارىسىندا قر ۇلتتىق مەملەكەتتىك كىتاپ پالاتاسىنىڭ ديرەكتورى جانات سەيدۋمانوۆ ماراپاتتاۋ مورالدىك ىنتالاندىرۋدىڭ ءبىرى، ولاردىڭ ەڭبەگىن مويىنداۋدىڭ كورىنىسى، شىعارماشىلىق ەڭبەگى مەن ادال قىزمەتىنىڭ، كىتاپ مادەنيەتىنىڭ دامۋىنا قوسقان جەكە ۇلەسى، سونداي-اق كىتاپتىڭ بەدەلىن كوتەرۋ بولىپ تابىلاتىنىن اتاپ ءوتتى.
سونداي-اق، «ءداۋىر» رەسپۋبليكالىق پوليگرافيالىق باسپا كەشەنىنىڭ باس ديرەكتورى سۆەتلانا نازاربايەۆا «GEMS Education» ءبىلىم قورىنىڭ ستيپەنديانتى قازاقستان ازاماتشاسى سايورا شوتپاقوۆاعا باعالى سىيلىقتار مەن كىتاپتار تابىستادى.
ايتا كەتكەن ءجون، «كىتاپ مادەنيەتىنە قوسقان زور ۇلەسى ءۇشىن» مەدالى قازاقستان جازۋشىلارى وداعى، ق ر ۇلتتىق مەملەكەتتىك كىتاپ پالاتاسى، قازاقستان باسپاشىلارى، پوليگرافيستەرى مەن كىتاپ تاراتۋشىلارى بىرلەستىگى (ا ي پ ك) جانە ق ر كىتاپحانا بىرلەستىگىمەن باسپا-پوليگرافيالىق سالاسى جۇمىسشىلارىن، كىتاپحانا جۇيەسىنىڭ جۇمىسشىلارىن، جازۋشىلاردى، اقىنداردى، سونداي-اق كورنەكتى وتاندىق جانە شەتەلدىك مادەنيەت، عىلىم جانە ساياسات قايراتكەرلەرىن كىتاپ مادەنيەتىنىڭ دامۋىنا قوسقان ەلەۋلى ۇلەسى ءۇشىن ماراپاتتاۋعا ارنالعان.
