الماتىدا ءىليا جاقانوۆتىڭ «دۇنيە، شىركىن...» كىتابىنىڭ تۇساۋكەسەرى ءوتتى
ادەبي-سازدى كەشكە ق ر ەڭبەك سىڭىرگەن قايراتكەرلەرى ءىليا جاقانوۆ، التىنبەك قورازبايەۆ، ءجۇرسىن ەرمان، ەرمۇرات ۇسەنوۆ، ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى حانگەلدى ءابجانوۆ، بەلگىلى ونەر مايتالماندارى بەكجان تۇرىس، گۇلميرا سارينا، ارداق بالاجانوۆا، جانعالي جۇزبايەۆ، گۇلزيرا بوكەيحان قىزى، قورقىت اتا اتىنداعى ع ز ي ديرەكتورىنىڭ ورىنباسارى، PhD دوكتورى نۇربولات بوگەنبايەۆ جانە قىزدار ۋنيۆەرسيتەتىنىڭ عىلىمي-پەداگوگيكالىق قۇرامى مەن ستۋدەنتتەرى قاتىستى.
بۇل ەسسە-ەلەگيالىق كىتاپ الاش ارداقتىلارىنىڭ اتى مەن شىعارماشىلىعىن، مەملەكەتتىك قىزمەتىن اقتاۋعا، قوعامدىق سانانىڭ جاڭعىرۋىنا، ەلىمىزدىڭ عىلىمى مەن ءبىلىمىنىڭ دامۋىنا، ادەبيەتى مەن ءتىلىنىڭ، مادەنيەتى مەن ونەرىنىڭ ءوسىپ-وركەندەۋىنە ۇلەس قوسقان مىرزاتاي جولداسبەكوۆتىڭ كومپوزيتورلىق-يمپروۆيزاتورلىق شىعارماشىلىعى تۋرالى سۋرەتتەيدى.
وقۋ ورنىنىڭ رەكتورى دينار نوكەتايەۆا قايراتكەر تۇلعانىڭ ۇلت رۋحانياتىنا، قازاق ادەبيەتى مەن ونەرىنىڭ دامۋىنا قوسقان ولشەۋسىز ۇلەسىن جەتكىزدى. سونداي-اق، ەل تاۋەلسىزدىگىنىڭ نىعايۋىنا اتسالىسىپ كەلە جاتقان تۇلعالارعا ۇلكەن ءىستىڭ تۇساۋىن قىزدار ۋنيۆەرسيتەتىندە كەسكەندىكتەرىنە زور ريزاشىلىعىن ءبىلدىرىپ، سەكسەننىڭ سەڭگىرىنە شىققان كىتاپتىڭ اۆتورى ءىليا جاقانوۆتىڭ يىعىنا قۇندىز شاپان جاپتى.
«اكادەميالىق ۇتقىرلىق بويىنشا وتاندىق جانە شەتەلدىك عالىمدار وقۋ وردامىزعا كەلىپ، ءدارىس وقيدى. قازاق ادەبيەتىنىڭ بىلگىرى، عالىم، قوعام قايراتكەرى مىرزاتاي جولداسبەكوۆ اعامىز وسى باعدارلاما بويىنشا ءدارىس وقۋ جونىندەگى ۇسىنىسىمىزدى قابىل الىپ، ەكى كۇننەن بەرى قىزدار ۋنيۆەرسيتەتىنىڭ ستۋدەنتتەرى، فيلولوگيا، ونەر ماماندىقتارىنىڭ تالىمگەرلەرى تاماشا ساباق تىڭداپ جاتىر. بۇگىنگى ادەبي-سازدى كەشتە قازاقتىڭ تانىمال پەرزەنتى ءىليا جاقانوۆ اعامىزدىڭ «دۇنيە، شىركىن...» اتتى كىتابىنىڭ تۇساۋى كەسىلىپ، كوپشىلىككە تانىستىرىلدى. جاڭا تۋىندى قۇتتى بولسىن! بولاشاق ۇرپاق ىزدەپ وقيتىن، ءبىلىم ءشولىن قاندىراتىن كىتاپقا اينالسىن!» دەدى قىزدار ۋنيۆەرسيتەتىنىڭ رەكتورى دينار نوكەتايەۆا.
«مىنە، الماتىدان الىستاپ، اتىراۋدا باتىس ونەرىن زەرتتەپ، شىعارماشىلىقپەن اينالىسىپ جاتقانىما ون التى جىل بولدى. تۇرلاۋسىز مىنا ومىردە ارزان، داڭعارا شوۋلاردىڭ كوبەيگەن شاعىندا وتە قۇندى دۇنيەگە شولىركەپ جۇرگەندە اتىراۋدا «مۇزارت» توبىنىڭ كونسەرتى ءوتتى. سول كونسەرتتە مىرزەكەڭنىڭ «دۇنيە، شىركىن...» ءانى ورىندالدى. ءاندى تىڭداپ وتىرىپ كەرەمەت كۇي كەشتىم. مازمۇندى، ماعىنالى، عاجاپ اننەن تەبىرەنىپ قايتتىم. مۋزىكاعا كەلگەندە وتە كىرپياز اداممىن. تالعاممەن قارايمىن. ءبىراق، «دۇنيە، شىركىن...» ءانىنىڭ فيلوسوفيالىق ءبىتىمى، ونىڭ قيالدىعى الىسقا ۇزاتاتىن تەرەڭدىگى وزگەشە قۇبىلىس. مىنە، سودان سوڭ مىرزاتاي جولداسبەكوۆتىڭ شىعارماشىلىعىنا ارناپ كىتاپ جازۋدى ءجون كوردىم»، دەدى ءىليا جاقانوۆ.
بەلگىلى سازگەر ادەمى ەستەلىكتەرىمەن بولىسە كەلە، بىرنەشە ءانىن شىرقاپ بەردى. جازۋشى-كومپوزيتور قىزدار ۋنيۆەرسيتەتىنە 80 ءانىنىڭ ءماتىنى مەن نوتاسى جارىق كورگەن كىتابىن تارتۋ ەتتى.
ادەبي سازدى كەشتە بەكجان تۇرىس، گۇلميرا سارينا، ارداق بالاجانوۆا، جانعالي جۇزبايەۆ، گۇلزيرا بوكەيحان قىزى سەكىلدى ونەر مايتالماندارى مىرزاتاي جولداسبەكوۆتىڭ «دۇنيە، شىركىن»، «ءاي، ۋگاي، ارماندامىن جاراتقانعا»، «بايتەرەك»، «قىز داۋرەن اقبوتا» سەكىلدى اندەرى مەن «تولعاۋ» جانە «قوسباسار» كۇيلەرىن ورىنداپ، جينالعان قاۋىمعا قازاق ءداستۇرلى ونەرىنىڭ قۇدىرەتىن سەزدىردى.
