قازاق كۇرەسى بويىنشا «الماتى بارىسى» تۋرنيرىنىڭ جەڭىمپازىنا اۆتوكولىك سىيلانادى

الماتى. قازاقپارات - الماتىدا قازاق كۇرەسى بويىنشا وتكىزىلەتىن «الماتى بارىسى» تۋرنيرىنىڭ جەڭىمپازىنا اۆتوكولىك تابىس ەتىلەدى.

بۇل تۋرالى بۇگىن الماتىدا وتكەن باسپا ءسوز ءماسليحاتى بارىسىندا الماتى قالالىق دەنە شىنىقتىرۋ جانە سپورت باسقارماسىنىڭ باسشىسى نايل نۇروۆ ءمالىم ەتتى.

«الماتى بارىسى» تۋرنيرىنە قالانىڭ ءار اۋدانىنان 3 بالۋاننان، ياعني بارلىعى 24 ۇمىتكەر قاتىسادى. ءبارىنىڭ دە سالماعى 90 كەلىدەن جوعارى. ال بۇعان دەيىن اۋداندىق جارىستارعا 200 بالۋان قاتىسقان بولاتىن.

«تۋرنيردە قازاقستاننىڭ ەڭ ۇزدىك سۋديالارى تورەشىلىك ەتەدى. «الماتى بارىسى» تۋرنيرىنىڭ جەڭىمپازىنا اۆتوكولىك سىيعا تارتىلادى. ودان باسقا، فينالعا شىققان ەكى بالۋان دا «قازاقستان بارىسى» رەسپۋبليكالىق تۋرنيرىنە قاتىسادى. جارىس بارىسىندا كورەرمەندەردىڭ قۇرمەتىنە كونسەرتتىك باعدارلاما ۇيىمداستىرىلادى. سوندىقتان، الماتىلىقتار بۇل سپورتتىق شاراعا بۇكىل وتباسىمەن كەلۋىنە بولادى»، - دەپ ءسوزىن اياقتادى دەنە شىنىقتىرۋ جانە سپورت باسقارماسىنىڭ باسشىسى.

ەسكە سالا كەتەلىك، «الماتى بارىسى» تۋرنيرى الداعى 2- مامىر كۇنى بالۋان شولاق اتىنداعى سپورت سارايىندا وتەدى.

اۆتور: ايبوتا جاپپاربەرگەن